భారత్, పాక్ మ‌ధ్య మ్యాచ్ అంటే హైఓల్టేజ్‌తో కూడుకున్న‌ది. మ్యాచ్ ప్రారంభం కాక‌ముందే రెండు దేశాల మ‌ధ్య మాట‌ల‌యుద్ధం మొద‌ల‌య్యింది. భారత వాయుసేన వింగ్ కమాండర్ అభినందన్ వర్ధమాన్‌ పాకిస్థాన్‌కు చెందిన అత్యాధునిక ఎఫ్‌–16 విమానాన్ని కూల్చివేసి, శత్రుదేశానికి పట్టుబడి కూడా సాహసోపేతంగా వ్యవహరించిన ఆయన.. స్వదేశానికి సురక్షితంగా తిరిగివచ్చిన విషయం తెలిసిందే.
ఇందులో భాగంగా పాకిస్తాన్‌కు చెందిన ఓ టీవీ చానల్ భారత వింగ్ కమాండర్ అభినందన్ పాత్రతో క్రియేటీవ్ యాడ్ ఒకటి వదిలింది. అందులో అభినందన్ టీ తాగిన తర్వాత కప్ తన వెంట తీసుకెళ్తుంటే.. పాక్ అధికారి ‘‘కప్ ఎక్కడికి తీసుకుపోతావ్ అది మాది’’ అంటాడు. ఈ యాడ్‌పై భారత అభిమానులు తీవ్రంగా ఆగ్ర‌హం వ్య‌క్తం చేశారు. పాక్ జట్టు వరల్డ్ కప్ కోసం కాదు.. టీ కప్పు కోసం పోరాడుతోందంటూ భారత నెటిజనులు ఓ ఆట ఆడేసుకుంటున్నారు. ఆ యాడ్‌కు కౌంట‌ర్‌గా ఇండియాకు చెందిన యూట్యూబ్ చానల్ ‘వి సెవన్ పిక్చర్స్’ శుక్రవారం ‘మౌకా మౌకా’ అనే వీడియోను పోస్టు చేసింది. ఈ వీడియో చూసిన భారత క్రికెట్ అభిమానులు చివరి సన్నివేశం చూసి విజిల్స్ వేస్తున్నారు.
భారత క్రికెట్ అభిమాని సెలూన్‌లో ఉండగా.. పాక్ అభిమాని అక్కడికి వచ్చి ‘ఫాదర్స్ డే’ గిఫ్ట్ ఇస్తాడు. గిఫ్టును తెరిచి చూస్తే అందులో రుమాల్ ఉంటుంది. అదేంటీ రుమాల్ ఇచ్చావని భారత అభిమాని అడుగుతాడు. ‘‘ఉంచుకో, మ్యాచ్‌లో ఓడిపోయిన తర్వాత ముఖం దాచుకోడానికి పనికి వస్తుంది’’ అని అంటాడు. అనంతరం సేవింగ్ చేయించుకోడానికి సిద్ధమవుతూ.. ‘‘ఈ గేమ్ చాలా దారుణంగా ఉంటుంది. ఒకే రోజులో కొడుకు తండ్రైపోతాడు’’ అని పంచ్ వేస్తాడు. దీంతో భారత అభిమానికి, బార్బర్‌కు కోపం వస్తుంది. భారత అభిమాని బార్బర్‌కు కంటితో సైగ చేస్తాడు. దీంతో బార్బర్ పాక్ అభిమానికి అభినందన్ తరహాలో గెడ్డం, మీసాలను కట్ చేస్తాడు. అది చూసి పాక్ అభిమాని బావురమంటాడు. ‘‘ఇది అభినందన్ స్టైల్. అతను మా హీరో’’ అని భారత అభిమాని సమాధానం ఇస్తాడు. ‘‘అతడు మా హీరో కాదు. బయట నా స్నేహితులు ఉన్నారు. నా ముఖం ఎలా చూపించుకోవాలి’’ అని పాక్ అభిమాని ఏడుపు ముఖం పెడతాడు. దీంతో భారత అభిమాని అతడికి రుమాల్ తిరిగిచ్చి ‘‘దీనితో నీ ముఖాన్ని దాచుకో’’ అనడంతో వీడియో ముగుస్తుంది.