ప్రముఖ కథానాయిక సమంత త్వరలో తల్లి కాబోతున్నట్లు ‘మా ఇంటి బంగారం’ సక్సెస్ మీట్లో స్వయంగా వెల్లడించారు. ఈ నేపథ్యంలో, ఆమె గర్భవతిగా ఉన్న సమయంలోనే సినిమా చిత్రీకరణలో పాల్గొన్న విషయాన్ని దర్శకురాలు నందినిరెడ్డి తాజాగా బయటపెట్టారు.
సాధారణంగా సమంత సమయపాలనకు కచ్చితంగా ఉంటారు. అయితే, ఒకరోజు ‘తస్సాదియా’ పాట షూటింగ్ సమయానికి ఆమె ఆలస్యంగా రావడంతో దర్శకురాలు నందినిరెడ్డి కంగారు పడ్డారు. ఆ విషయంపై ఆమె మాట్లాడుతూ.. “షూటింగ్లో భాగంగా రెండో రోజు రాగానే, జ్వరం ఎందుకు తగ్గడం లేదని సమంతను అడిగాను. అప్పుడే ఆమె, ‘జ్వరం కాదు, నేను గర్భవతిని. ఈ విషయం ఎవరికీ చెప్పకండి’ అని నాతో చెప్పింది. అది విని నాకెంతో ఆనందం వేసింది” అని గుర్తు చేసుకున్నారు.
సమంతకు ఆరోగ్యం బాలేదని తెలియగానే, డ్యాన్స్ మాస్టర్తో మాట్లాడి ఆమెపై ఎక్కువ భారం పడకుండా జాగ్రత్తలు తీసుకున్నట్లు నందిని రెడ్డి తెలిపారు. కష్టమైన స్టెప్పులకు బదులు చిన్న చిన్న కదలికలతోనే పాటను చిత్రీకరించామన్నారు. మార్నింగ్ సిక్నెస్తో బాధపడుతున్నప్పటికీ, ఆమె తన పాత్రకు పూర్తి న్యాయం చేశారని పేర్కొన్నారు. సినిమాలోని కార్ యాక్సిడెంట్, ఛేజింగ్ వంటి యాక్షన్ సన్నివేశాల సమయంలో కూడా సమంతపై ఒత్తిడి పడకుండా, మధ్యాహ్నం 3.30 గంటల తర్వాత నీడలోనే షూటింగ్ నిర్వహించామని చెప్పారు.
సమంతను తెరపై అత్యుత్తమంగా చూపించాలనే లక్ష్యంతోనే చిత్రబృందం మొత్తం ఎంతో జాగ్రత్తగా పని చేసిందని నందిని రెడ్డి వివరించారు. తల్లి కాబోతున్నాననే సంతోషాన్ని వ్యక్తిగతంగా ఉంచుతూనే, వృత్తిపరమైన నిబద్ధతతో షూటింగ్ను పూర్తి చేసిన ఆమె ధైర్యాన్ని నెటిజన్లు ప్రశంసిస్తున్నారు.