మంచు విష్ణు కథానాయకుడిగా నటించిన భక్తిరస చిత్రం ‘కన్నప్ప’ సినీ అభిమానులకు ఊహించని శుభవార్త అందించింది. ప్రముఖ దర్శకుడు ముఖేశ్కుమార్ సింగ్ తెరకెక్కించిన ఈ భారీ చిత్రాన్ని మంచు విష్ణు యూట్యూబ్లో ఉచితంగా విడుదల చేశారు. థియేటర్లలో ఈ సినిమా చూడని వారు ఇప్పుడు ఈ వీకెండ్లో ఇంట్లోనే హాయిగా ఆస్వాదించవచ్చు.
మోహన్బాబు నిర్మాతగా వ్యవహరించిన ఈ సినిమాలో స్టార్ హీరోలు అక్షయ్ కుమార్, మోహన్ లాల్, ప్రభాస్ సహా కాజల్, బ్రహ్మానందం కీలక పాత్రలు పోషించారు. భక్త కన్నప్ప జీవిత కథ ఆధారంగా రూపొందిన ఈ సినిమా విజువల్ వండర్గా ప్రేక్షకులను కట్టిపడేసింది. అద్భుతమైన నిర్మాణ విలువలు, గ్రాఫిక్స్తో భక్తిని కలగలిపి దర్శకుడు తెరకెక్కించిన తీరు తెలుగు ప్రేక్షకులను విశేషంగా ఆకట్టుకుంది.
ఈ సినిమా విడుదలై ఇటీవలే ఏడాది పూర్తయింది. ఈ సందర్భంగా గత నెల 27న పరిమిత సంఖ్యలోని థియేటర్లలో తిరిగి ఈ చిత్రాన్ని విడుదల చేశారు. అభిమానుల కోరిక మేరకు ఇప్పుడు మంచు విష్ణు ఈ సినిమాను నేరుగా యూట్యూబ్లో అందుబాటులోకి తెచ్చారు. ఏమాత్రం ఖర్చు లేకుండా, ఇంట్లోనే కుటుంబమంతా కలిసి చూసే వెసులుబాటు కల్పించడం పట్ల అభిమానులు సంతోషం వ్యక్తం చేస్తున్నారు.
గతంలో థియేటర్లలో మిస్ అయిన వారు లేదా మరోసారి ఈ భక్తిరస కావ్యాన్ని చూడాలనుకునే వారు యూట్యూబ్లో ‘కన్నప్ప’ను వీక్షించవచ్చు. స్టార్ క్యాస్టింగ్ ఉండటం, కన్నప్ప భక్తి పారవశ్యాన్ని కొత్త తరహాలో చూపించడం ఈ సినిమాకు ప్రధాన ఆకర్షణగా నిలిచాయి. మంచి కంటెంట్ ఉన్న సినిమాలను డిజిటల్ వేదికలపై ఉచితంగా అందించడంపై సినీ విశ్లేషకులు కూడా సానుకూలంగా స్పందిస్తున్నారు. ఇంకెందుకు ఆలస్యం? ఈ వీకెండ్లో మీరు కూడా ‘కన్నప్ప’ చూసి ఆ అనుభూతిని పొందండి.