 మనుషుల నియంత్రణలో ఉండేలా పకడ్బందీ చర్యలు తీసుకోవాల్సిన బాధ్యత అమెరికాపై, తమ దేశంపై ఉందని చైనా అధ్యక్షుడు షీ జిన్పింగ్ అభిప్రాయపడ్డారు. గురువారం శ్వేతసౌధంలో అమెరికా అధ్యక్షుడు డొనాల్డ్ ట్రంప్నుద్దేశించి ఆయన ఈ వ్యాఖ్యలు చేశారు.){kind=link}
కృత్రిమ మేధ (AI) మనుషుల నియంత్రణలో ఉండేలా పకడ్బందీ చర్యలు తీసుకోవాల్సిన బాధ్యత అమెరికాపై, తమ దేశంపై ఉందని చైనా అధ్యక్షుడు షీ జిన్పింగ్ అభిప్రాయపడ్డారు. గురువారం శ్వేతసౌధంలో అమెరికా అధ్యక్షుడు డొనాల్డ్ ట్రంప్నుద్దేశించి ఆయన ఈ వ్యాఖ్యలు చేశారు. కృత్రిమ మేధను మానవాళి మేలు కోసం మాత్రమే అభివృద్ధి చేయాలని, పూర్తిగా మానవ ప్రమేయంతోనే దీన్ని నియంత్రించాలని పిలుపునిచ్చారు.
ట్రంప్ కూడా ఈ అంశంపై స్పందించారు. కృత్రిమ మేధ ఇప్పుడు ఏ స్థాయిలో ఉందో.. భవిష్యత్తులో కూడా అదే స్థాయిలో ఉండిపోయేలా చూడాలని తాను, జిన్పింగ్ కోరుకుంటున్నట్లు ట్రంప్ తెలిపారు. దాదాపు దశాబ్ద కాలం తర్వాత షీ జిన్పింగ్ తొలిసారిగా మూడురోజుల అధికారిక పర్యటన కోసం అమెరికా చేరుకున్నారు. ఈ సందర్భంగా ఇరుదేశాలు భాగస్వాములుగా ఉండాలే తప్ప శత్రువులుగా ఉండకూడదని జిన్పింగ్ స్పష్టం చేశారు.
చైనా ప్రజల తరఫున అమెరికా ప్రజలకు జిన్పింగ్ శుభాకాంక్షలు తెలిపారు. చైనా, అమెరికాలు రెండు అత్యంత గొప్ప దేశాలని కొనియాడారు. ఇరుదేశాల ప్రజల ప్రయోజనాలు ఒకదానితో ఒకటి పరస్పరం పెనవేసుకొని ఉన్నాయని చెప్పారు. కొత్త యుగంలో కలిసికట్టుగా ముందుకు సాగేందుకు తగిన మార్గాన్ని కనుగొంటామని ఆశాభావం వ్యక్తం చేశారు. మన మధ్య ఆరోగ్యకరమైన పోటీ ఉండాలని, అది ఎప్పుడూ పరిమితులకు లోబడే జరగాలని ఆయన సూచించారు.
ఈ పోటీ ఒకరిని దాటిపోయేందుకు చేసే పరుగుపందెంలా ఉండాలే తప్ప, ఒకరు ఓడి మరొకరు గెలిచే మల్లయుద్ధంలా ఉండకూడదని జిన్పింగ్ అభివర్ణించారు. రానున్న ఐదేళ్లలో చైనాలో చదువుకునేందుకు లక్ష మంది అమెరికన్ యువతను ఆహ్వానిస్తున్నట్లు ప్రకటించారు. పరస్పర సహకారంతోనే రెండు దేశాలు లబ్ధి పొందుతాయని, ఘర్షణలతో ఇరుపక్షాలకూ నష్టమే తప్ప లాభం లేదని ఆయన స్పష్టం చేశారు.
జిన్పింగ్ దంపతులకు అమెరికాలో అరుదైన, అనూహ్య ఘనస్వాగతం లభించింది. ట్రంప్, ఆయన సతీమణి మెలానియా ట్రంప్ స్వయంగా మెరీల్యాండ్లోని జాయింట్ యాండ్రూస్ సైనిక విమానాశ్రయానికి వెళ్లి వారికి స్వాగతం పలికారు. జిన్పింగ్ రాక కోసం 100 అడుగుల భారీ రెడ్కార్పెట్ ఏర్పాటు చేశారు. అమెరికా, చైనా జాతీయ జెండాల నడుమ మిలిటరీ బ్యాండ్ సంగీతం మోగుతుండగా.. రెండు దేశాల అధినేతలు పక్కపక్కనే నిలబడ్డారు. అదే సమయంలో ఆకాశంలో రెండు బీ-1 బాంబర్లు విన్యాసాలు చేశాయి. రన్వేపై ఆరు ఎఫ్-22, మరో ఆరు ఎఫ్-16 యుద్ధ విమానాలు బారులు తీరి గౌరవ వందనం సమర్పించాయి. ఈ పర్యటన సందర్భంగా అట్లాంటా జంతుప్రదర్శనశాలకు రెండు అరుదైన పాండాలను బహూకరిస్తున్నట్లు జిన్పింగ్ ప్రకటించారు.
ఇరుదేశాల మధ్య వాణిజ్య సంబంధాలపై కూడా కీలక నిర్ణయాలు వెలువడ్డాయి. అమెరికా, చైనాలు తమ వాణిజ్య యుద్ధ విరామాన్ని మరో రెండు నెలలపాటు పొడిగించాలని నిర్ణయించాయి. ఈ విరామ సమయంలో మరింత విస్తృతమైన ఆర్థిక ఒప్పందం కుదిరే అవకాశం ఉందని అమెరికా ఆర్థిక మంత్రి స్కాట్ బెసెంట్ వెల్లడించారు. గత సంవత్సరం అక్టోబరులో దక్షిణ కొరియాలో జరిగిన సమావేశంలో ఇరుదేశాల అధినేతలు ఈ వాణిజ్య యుద్ధాన్ని ఏడాది పాటు పక్కనపెట్టాలని నిర్ణయించారు. నాటి ఒప్పందానికి రానున్న నవంబరులో గడువు ముగియనుంది. ఈ నేపథ్యంలో దాన్ని జనవరి 10 వరకు పొడిగించాలని తాజాగా నిర్ణయించారు. వచ్చే జనవరి కల్లా మరింత విస్తృతమైన ఆర్థిక ప్యాకేజీపై ఇరుదేశాలూ ఒప్పందం కుదుర్చుకునే అవకాశం ఉందని అమెరికా ఆర్థిక మంత్రి తెలిపారు.