 జ్ఞానేశ్‌ కుమార్ రాజీనామా చేయాలని డిమాండ్ చేస్తూ ఆందోళనలు చేపట్టారు.){kind=link}
దేశ రాజధాని దిల్లీలోని జంతర్‌ మంతర్‌ వద్ద ఆదివారం తీవ్ర ఉద్రిక్తత నెలకొంది. కేంద్ర ఎన్నికల ప్రధాన కమిషనర్ (సీఈసీ) జ్ఞానేశ్‌ కుమార్ రాజీనామా చేయాలని డిమాండ్ చేస్తూ ఆందోళనలు చేపట్టారు. అఖిల భారత విద్యార్థి సంఘం (ఏఐఎస్ఏ) కార్యకర్తలు, ఆప్ నేతలు ఈ నిరసనల్లో పాల్గొన్నారు. పెద్ద సంఖ్యలో తరలివచ్చిన ఆందోళనకారులు కేంద్ర ప్రభుత్వానికి వ్యతిరేకంగా నినాదాలు చేశారు.
పరిస్థితి ఉద్రిక్తంగా మారడంతో పోలీసులు రంగంలోకి దిగారు. నిరసనకారులను నిలువరించేందుకు భారీగా బారికేడ్లు ఏర్పాటు చేశారు. శాంతిభద్రతలకు విఘాతం కలగకుండా పలువురు కార్యకర్తలను అదుపులోకి తీసుకున్నారు. వారిని తరలించేందుకు ప్రత్యేక పోలీసు బస్సును అక్కడికి రప్పించారు. అదుపులోకి తీసుకున్న నేతలను, విద్యార్థులను పోలీసులు బస్సులోకి ఎక్కించడం ప్రారంభించారు.
అయితే అదే సమయంలో ఓ నాటకీయ సంఘటన చోటుచేసుకుంది. బస్సు డ్రైవర్ సీటు వద్దకు వచ్చిన ఓ యువతి ఎవరూ ఊహించని పని చేసింది. డ్రైవర్ ఏమరుపాటుగా ఉన్న సమయంలో బస్సు తాళాలను చటుక్కున తీసుకుంది. అనంతరం అక్కడి నుంచి వేగంగా పారిపోయింది. ఈ ఆకస్మిక పరిణామంతో పోలీసులు, డ్రైవర్ తీవ్ర షాక్‌కు గురయ్యారు. తాళాలు లేకపోవడంతో ఆ బస్సు రోడ్డు మధ్యలోనే నిలిచిపోయింది.
బస్సు కదలకపోవడంతో రాకపోకలకు తీవ్ర అంతరాయం ఏర్పడింది. ట్రాఫిక్ స్తంభించిపోవడంతో పోలీసులు స్వయంగా బస్సును చేతులతో తోసుకుంటూ పక్కకు జరపాల్సి వచ్చింది. ఈ దృశ్యాలను అక్కడున్న కొందరు వీడియో తీసి సోషల్ మీడియాలో పోస్ట్ చేశారు. ప్రస్తుతం ఈ వీడియో ఇంటర్నెట్‌లో తెగ వైరల్ అవుతోంది. డ్రైవర్ సైతం నవ్వుతూ జరిగిన విషయాన్ని పోలీసులకు చెప్పడం ఇందులో కనిపించింది.
సీఈసీ జ్ఞానేశ్‌ కుమార్ తన పదవికి రాజీనామా చేసేవరకు ఉద్యమం ఆపబోమని ఏఐఎస్ఏ నేతలు స్పష్టం చేశారు. సోమవారం కూడా జంతర్‌ మంతర్‌ వద్ద నిరసన కార్యక్రమాలు కొనసాగిస్తామని ప్రకటించారు. వరుసగా మూడో రోజు కూడా ఆందోళనలు ఉద్ధృతం కావడంతో దిల్లీ పోలీసులు ఆ ప్రాంతంలో భద్రతను మరింత కట్టుదిట్టం చేశారు.