కేంద్ర ఎన్నికల ప్రధాన కమిషనర్ జ్ఞానేశ్‌ కుమార్‌ రాజీనామా చేయాలని కాంగ్రెస్ నేత రాహుల్ గాంధీ డిమాండ్ చేశారు. ఈ మేరకు సుప్రీంకోర్టు వైపు పార్టీ ఆధ్వర్యంలో భారీ ర్యాలీ తలపెట్టారు. దిల్లీలో ఏర్పాటు చేసిన మీడియా సమావేశంలో ఆయన కేంద్ర ప్రభుత్వంపై తీవ్రస్థాయిలో ధ్వజమెత్తారు.
ఆందోళనల నేపథ్యంలో దిల్లీ నగరాన్ని పోలీసులు జైలుగా మార్చారని రాహుల్ విమర్శించారు దాదాపు 30 వేల మంది పోలీసులను రోడ్లపై మోహరించి ప్రజలను భయభ్రాంతులకు గురిచేస్తున్నారని ఆరోపించారు. దేశ రాజధానిని ఒక కోటలా మార్చాల్సిన అవసరం ప్రభుత్వానికి ఏమొచ్చిందని ప్రశ్నించారు. యువతకు లేని స్వేచ్ఛ సంఘ్‌ పరివార్‌ శక్తులకు ఎందుకు ఇస్తున్నారని నిలదీశారు.
ఎన్నికల వ్యవస్థలో జరుగుతున్న ఓట్ల చోరీపై భారత ప్రధాన న్యాయమూర్తిని కలవాలని ప్రయత్నించినట్లు ఆయన తెలిపారు. సీజేఐ అపాయింట్‌మెంట్‌ కోరినా అనుమతి దక్కలేదని అసంతృప్తి వ్యక్తం చేశారు. అందుకే సమస్యను న్యాయస్థానం ముందు ఉంచేందుకు సుప్రీంకోర్టుకు ర్యాలీగా వెళ్తున్నామని వివరించారు. సీఈసీపై అత్యున్నత న్యాయస్థానంలో పిటిషన్ దాఖలు చేస్తామని వెల్లడించారు.
జ్ఞానేశ్‌ కుమార్‌ తీవ్ర ఒత్తిడిలో విధులు నిర్వహిస్తున్నారని రాహుల్ పేర్కొన్నారు. ఆయన నుంచి తనకు సందేశాలు కూడా వస్తున్నాయని చెప్పారు. ఇప్పటికైనా ఆయన అప్రూవర్‌గా మారి రాజీనామా చేయాలని సూచించారు. అలా చేస్తే దేశానికి నిజమైన సేవ చేసినట్లు అవుతుందని, అప్పుడే క్షమిస్తామని వ్యాఖ్యానించారు.
ప్రస్తుతం ప్రజలు ఒకవైపు ఉంటే, పాలకుల బృందం మరోవైపు ప్రజాస్వామ్యాన్ని కాలరాస్తోందని రాహుల్ మండిపడ్డారు. మోదీ ప్రభుత్వంలోని 200 మంది అధికారులు తమతో టచ్‌లో ఉన్నారని సంచలన విషయం వెల్లడించారు. ఇది వ్యక్తుల మధ్య పోరాటం కాదని, రాజ్యాంగ పరిరక్షణ కోసం జరుగుతున్న ఉద్యమమని స్పష్టం చేశారు. ఎన్నికల వ్యవస్థ ప్రక్షాళన జరిగే వరకు తమ పోరాటం ఆగదని హెచ్చరించారు.