వెస్టిండీస్‌తో హోరాహోరీ టీ20 సిరీస్‌ను ముగించిన భారత జట్టు మరో సరికొత్త సవాలుకు సిద్ధమైంది. క్రైస్ట్‌చర్చ్‌ వేదికగా గురువారం న్యూజిలాండ్‌తో నేడు తొలి టి20 పోరు జరగనుంది. మొత్తం ఐదు మ్యాచ్‌ల ఈ సిరీస్‌లో ఇరు జట్లు అమీతుమీ తేల్చుకోనున్నాయి. భారత కాలమానం ప్రకారం ఈ మ్యాచ్ మధ్యాహ్నం 12:30 గంటలకు ప్రారంభం కానుంది. సోనీ స్పోర్ట్స్‌ ఛానెల్స్‌తో పాటు సోనీ లివ్‌ యాప్‌లో ఈ మ్యాచ్ ప్రత్యక్ష ప్రసారం అవుతుంది.
భారత జట్టుకు అక్కడి వాతావరణ పరిస్థితులు ప్రధాన సవాలుగా మారాయి. జట్టులోని నలుగురు ఆటగాళ్లకు మాత్రమే కివీస్ గడ్డపై ఆడిన అనుభవం ఉంది. సుదీర్ఘ ప్రయాణం వల్ల మన ఆటగాళ్లకు తగినంత విశ్రాంతి దక్కలేదు. ప్రాక్టీస్‌కు కూడా ఎక్కువ సమయం లభించలేదు. ఓపెనర్లుగా సంజూ శాంసన్, అభిషేక్ శర్మ బరిలోకి దిగడం ఖాయంగా కనిపిస్తోంది. ఆంధ్ర ఆల్‌రౌండర్‌ నితీశ్‌ కుమార్‌ రెడ్డి తుది జట్టులో స్థానం దక్కించుకునే అవకాశం ఉంది. శ్రేయస్ అయ్యర్, ఇషాన్ కిషన్, తిలక్ వర్మ, శివమ్ దూబేలతో భారత బ్యాటింగ్ లైనప్ పటిష్టంగా ఉంది.
మరోవైపు ఆతిథ్య న్యూజిలాండ్ జట్టు పూర్తి బలంతో బరిలోకి దిగుతోంది. ఇటీవల కాలంలో పలువురు ఆటగాళ్లు లీగ్‌ల వల్ల జాతీయ జట్టుకు దూరంగా ఉన్నారు. ప్రస్తుతం పూర్తి స్థాయి ఆటగాళ్లు జట్టుకు అందుబాటులోకి వచ్చారు. ఫిన్ అలెన్, టిమ్ సీఫెర్ట్ వంటి విధ్వంసక ఓపెనర్లు జట్టులో ఉన్నారు. డెవాన్ కాన్వే, గ్లెన్ ఫిలిప్స్, డారిల్ మిచెల్‌లతో కివీస్ మిడిలార్డర్ ఎంతో బలంగా కనిపిస్తోంది. పదునైన పేస్ బౌలర్లు కివీస్ బలంగా మారారు.
క్రైస్ట్‌చర్చ్‌ మైదానంలో కొత్తగా వేసిన రెడీమేడ్ పిచ్‌లపై మ్యాచ్ జరగనుంది. ఇక్కడ చలి వాతావరణం బౌలర్ల స్వింగ్‌కు బాగా అనుకూలించే అవకాశం ఉంది. రాత్రి వేళల్లో మంచు ప్రభావం ఆటపై తీవ్రంగా ఉండనుంది. ఈ మైదానంలో జరిగిన గత 8 టీ20 మ్యాచ్‌ల్లో ఒక్కసారి కూడా 200 పరుగుల మార్కు దాటలేదు. అందువల్ల ఈ మ్యాచ్‌లో భారీ స్కోర్ల కంటే తక్కువ స్కోర్లతో కూడిన ఉత్కంఠభరిత పోరు సాగే సూచనలు కనిపిస్తున్నాయి.