కాకినాడ జిల్లా జగ్గంపేట నియోజకవర్గంలో పవన్ కల్యాణ్ నేతృత్వంలోని జనసేన పార్టీకి గట్టి ఎదురుదెబ్బ తగిలింది. ఆ పార్టీ కీలక నేత పాఠంశెట్టి సూర్యచంద్ర తన సతీమణి శ్రీదేవితో కలిసి వైఎస్సార్‌సీపీ తీర్థం పుచ్చుకున్నారు. తాడేపల్లిలోని కేంద్ర కార్యాలయంలో మాజీ ముఖ్యమంత్రి, వైఎస్సార్‌సీపీ అధినేత వైఎస్ జగన్‌మోహన్‌రెడ్డి సమక్షంలో వారు పార్టీలో చేరారు. జగన్ వారికి పార్టీ కండువాలు కప్పి సాదరంగా ఆహ్వానించారు. మాజీ ఎంపీ తోట నరసింహంతో పాటు పలువురు నేతలు ఈ కార్యక్రమంలో పాల్గొన్నారు.
పాఠంశెట్టి సూర్యచంద్రకు జగ్గంపేట నియోజకవర్గంలో బలమైన ప్రజాదరణ ఉంది. ఆయన మూడుసార్లు బూరుగుపూడి గ్రామ సర్పంచ్‌గా బాధ్యతలు నిర్వర్తించారు. తన గ్రామాన్ని ఆదర్శవంతంగా తీర్చిదిద్ది గుర్తింపు పొందారు. గత 30 ఏళ్లుగా ఆయన ప్రత్యక్ష రాజకీయాల్లో కొనసాగుతున్నారు. 2019 అసెంబ్లీ ఎన్నికల్లో జనసేన అభ్యర్థిగా పోటీ చేశారు. ఆ తర్వాత 2024 ఎన్నికల్లో స్వతంత్ర అభ్యర్థిగా బరిలోకి దిగి 12,531 ఓట్లు సాధించి తన బలాన్ని నిరూపించుకున్నారు.
పార్టీలో చేరిన అనంతరం సూర్యచంద్ర మాట్లాడారు. వైఎస్ జగన్ నాయకత్వంపై ఉన్న నమ్మకంతోనే పార్టీలో చేరినట్లు తెలిపారు. ఎన్నికల సమయంలో కూటమి ప్రభుత్వం సూపర్ సిక్స్ పేరుతో అనేక హామీలు ఇచ్చిందని గుర్తుచేశారు. ఇప్పటివరకు అందులో పది శాతం హామీలను కూడా నెరవేర్చలేదని విమర్శించారు. అభివృద్ధి, సంక్షేమంపై కూటమి నేతలను ప్రజలు గట్టిగా నిలదీయాలని కోరారు.
వైఎస్ జగన్ మళ్లీ ముఖ్యమంత్రి అయ్యే వరకు నిరంతరం శ్రమిస్తానని సూర్యచంద్ర స్పష్టం చేశారు. జగ్గంపేట నియోజకవర్గంలో వైఎస్సార్‌సీపీని మరింత బలోపేతం చేస్తానని హామీ ఇచ్చారు. ప్రజా సమస్యలపై నిరంతరం పోరాడతానని చెప్పారు. త్వరలో జరగనున్న ఎంపీటీసీ, జెడ్పీటీసీ, స్థానిక సంస్థల ఎన్నికల్లో పార్టీ అభ్యర్థుల గెలుపునకు కార్యకర్తలు ఐక్యంగా కృషి చేయాలని పిలుపునిచ్చారు.