దుల్కర్ కెరీర్‌లో ‘ఆకాశంలో ఒక తార’ ఓ మైలురాయి: అల్లు అర్జున్

‘ఆకాశంలో ఒక తార’ సినిమా కథ, అందులోని భావోద్వేగాలు చాలా బాగున్నాయని ఐకాన్ స్టార్ అల్లు అర్జున్ ప్రశంసించారు. ప్రతి అమ్మాయి కల నెరవేరాలనే మంచి సందేశంతో ఈ చిత్రాన్ని తెరకెక్కించారని ఆయన తెలిపారు. ఈ సినిమా ఘన విజయం సాధించాలని తాను మనస్ఫూర్తిగా కోరుకుంటున్నట్లు చెప్పారు.

దుల్కర్ సల్మాన్, సాత్విక వీరవల్లి జంటగా నటించిన ఈ చిత్రానికి పవన్ సాధినేని దర్శకత్వం వహించారు. గీతా ఆర్ట్స్, స్వప్న సినిమా సమర్పణలో సందీప్ గుణ్ణం, రమ్య గుణ్ణం దీనిని నిర్మించారు. శ్రుతిహాసన్, రుహానీ శర్మ ఈ చిత్రంలో కీలక పాత్రలు పోషించారు. నవంబర్ 20న ఈ సినిమా థియేటర్లలో విడుదల కానుంది. ఈ నేపథ్యంలో ఆదివారం రాత్రి హైదరాబాద్‌లో ప్రీరిలీజ్ వేడుకను ఘనంగా నిర్వహించారు. ఈ కార్యక్రమానికి అల్లు అర్జున్ ముఖ్య అతిథిగా హాజరయ్యారు.

ఈ సందర్భంగా అల్లు అర్జున్ మాట్లాడుతూ దుల్కర్ సల్మాన్ కెరీర్‌పై ఆసక్తికర వ్యాఖ్యలు చేశారు. దుల్కర్ తొలి సినిమా నుంచి ఆయన ఎదుగుదలను తాను గమనిస్తున్నానని చెప్పారు. ఓవైపు మలయాళంలో సినిమాలు చేస్తూనే, తమిళంలో మణిరత్నం వంటి దిగ్గజ దర్శకులతో పనిచేశారని గుర్తు చేశారు. తెలుగులో ‘మహానటి’, ‘సీతారామం’, ‘లక్కీ భాస్కర్’ వంటి హిట్ చిత్రాలతో విజయయాత్ర కొనసాగిస్తున్నారని కొనియాడారు.

దుల్కర్ నటన, కథలను ఎంచుకునే విధానం తనకు ఎంతో ఇష్టమని బన్నీ తెలిపారు. ‘ఆకాశంలో ఒక తార’ కూడా ఆయన కెరీర్‌లో ఒక మైలురాయిగా నిలిచిపోతుందని ధీమా వ్యక్తం చేశారు. ఈ సినిమా విషయంలో తమ నాన్న అల్లు అరవింద్ చాలా ఉత్సాహంగా ఉన్నారని చెప్పారు. చిత్ర టీజర్, ట్రైలర్ చూసినప్పుడు తనకూ అదే అనుభూతి కలిగిందని అన్నారు.

ఈ సినిమాకు ఎన్ని డబ్బులు వస్తాయనే దానికంటే, ఒక గొప్ప కథను ప్రేక్షకులకు అందిస్తున్నామనే ఆసక్తి ఎక్కువగా ఉందని నిర్మాత అల్లు అరవింద్ అన్నారు. తన కెరీర్‌లోనే అత్యంత ప్రత్యేకమైన సినిమాల్లో ఇదొకటని హీరో దుల్కర్ సల్మాన్ పేర్కొన్నారు. ఆడపిల్లల కలల నేపథ్యంలో సాగే ఈ చిత్రం అందరినీ ఆకట్టుకుంటుందని ఆయన ఆశాభావం వ్యక్తం చేశారు. ఈ వేడుకలో జీవీ ప్రకాశ్ కుమార్, స్వప్నదత్ సహా చిత్ర బృందం పాల్గొంది.