హైదరాబాద్ మెట్రో ప్రయాణకులకు ఝలక్ ఇచ్చింది. అధికారికంగా టికెట్ ధరలు పెంపును ప్రకటించింది. కనిష్ఠ టికెట్ ధర ₹10 నుంచి ₹12కి, గరిష్ఠ టికెట్ ధర ₹60 నుంచి ₹75కి పెంచినట్లు అధికారులు తెలిపారు. ఈ పెరిగిన టికెట్ ధరలు రేపటి నుంచి అమల్లోకి వస్తాయని మెట్రో అధికారులు స్పష్టం చేశారు.
హైదరాబాద్ మెట్రో రైలు సేవలు ముఖ్యంగా ఉద్యోగులు, విద్యార్థులు, రోజువారీ ప్రయాణికులకు సేవలను అందిస్తోంది. ట్రాఫిక్ భీకరంగా మారుతున్న నగరంలో, వేగం మరియు సౌకర్యం కోసం చాలామంది బస్సులు, వ్యక్తిగత వాహనాలను వదిలి మెట్రోను ఎంచుకుంటున్నారు.
మెట్రో సేవలు ప్రారంభమైనప్పటి నుండి ఆర్థికంగా నష్టాలు ఎదురవుతున్నాయని అధికారులు తెలిపారు. ఈ నేపథ్యంలో, నిర్వహణ ఖర్చులు మరియు మౌలిక సదుపాయాల అభివృద్ధి కోసం ఈ టికెట్ ధర పెంపు తప్పదని పేర్కొన్నారు. ఇటీవల మెట్రో రైలు అధికారులు ప్రయాణికుల సంఖ్య పెరుగుతోందని చెబుతూ, సాయంత్రం సమయాల్లో మెట్రో సర్వీసులను విస్తరించారు. ఇది రాత్రి పూట ప్రయాణించేవారికి ఊరట కలిగించినప్పటికీ, తాజా ధరల పెంపు మాత్రం ప్రయాణీకులకు షాకే.
