మెనోపాజ్ అనేది కేవలం హార్మోన్ల మార్పు మాత్రమే కాదు ఇది మహిళల గుండె ఆరోగ్యానికి కీలక మలుపు కూడా అని డాక్టర్లు చెబుతున్నారు. అధిక శాతం మహిళలు మెనోపాజ్ సమస్యతో బాధపడుతుంటారు. అయితే మెనోపాజ్ అనేది కేవలం ప్రసవశక్తి ముగింపు కాదు, మహిళ గుండె ఆరోగ్యానికి ఒక మలుపు అని వైద్య నిపుణులు చెబుతున్నారు.
ఏళ్ల తరబడి ఎస్ట్రోజెన్ అనే హార్మోన్ మహిళల గుండెకు నిశ్శబ్ద రక్షకుడిగా పనిచేసింది . ఇది కొలెస్ట్రాల్ స్థాయులను నియంత్రిస్తుంది. ధమనులను కవచంగా ఉంచి, రక్త ప్రవాహం సజావుగా ఉండేలా చేస్తుంది. కానీ, మెనోపాజ్ తర్వాత ఎస్ట్రోజెన్ స్థాయి తగ్గిపోవడంతో ఆ రక్షణ తగ్గుతుంది. మెనోపాజ్కు ముందు మహిళలు సాధారణంగా నడుము, తొడల వద్ద కొవ్వు నిల్వ చేస్తారు..ఇది పెద్దగా హానికరం కాదు. కానీ మెనోపాజ్ తర్వాత ఆ కొవ్వు పొట్ట చుట్టూ (విసరల్ ఫ్యాట్) చేరుతుంది.ఇది ఇన్సులిన్ రెసిస్టెన్స్, డయాబెటిస్, అధిక ట్రైగ్లిసరైడ్లకు దారితీస్తుంది అని డాక్టర్లు తెలిపారు.
ఈ మార్పు, తగ్గిన ఎస్ట్రోజెన్తో కలిసిపోవడం వల్ల ధమనుల్లో ప్లాక్ పేరుకుపోయి (అథెరోస్క్లెరోసిస్), హార్ట్ అటాక్లు లేదా స్ట్రోక్లకు దారితీసే ప్రమాదం పెరుగుతుంది.
ఏళ్ల తరబడి హార్ట్ డిసీజ్ను “పురుషుల వ్యాధి”గా భావించారు. కానీ ప్రపంచవ్యాప్తంగా మహిళల్లో మరణాలకు ప్రధాన కారణం గుండె వ్యాధులే — అన్ని రకాల క్యాన్సర్లకంటే ఎక్కువ.
మహిళలకు సాధారణంగా ‘ఛాతీ నొప్పి’ వంటి క్లాసిక్ లక్షణాలు కనిపించవు. దవడ, మెడ నొప్పి, తల తిరగడం, వాంతులు లేదా అసాధారణ అలసటగా కనిపించవచ్చు… ఇవి వయస్సు లేదా ఒత్తిడిగా భావించి నిర్లక్ష్యం చేస్తారు. సరైన అవగాహన ఉంటే ఈ ప్రమాదాన్ని చాలా వరకు నియంత్రించవచ్చు. 45 ఏళ్లు దాటిన మహిళలు బీపీ, కొలెస్ట్రాల్, బ్లడ్ షుగర్, బిఎంఐ వంటి పరీక్షలను ప్రతి సంవత్సరం చేయించుకోవాలి.
ఫైబర్ అధికంగా ఉన్న కూరగాయలు, పండ్లు, పప్పులు, సీడ్స్, మరియు ఒమేగా-3 ఫ్యాటీ యాసిడ్లు ఉన్న ఆహారం తీసుకోవడం హార్మోన్ సమతుల్యాన్ని మరియు గుండె ఆరోగ్యాన్ని కాపాడుతుంది. వ్యాయామం అనేది తప్పనిసరి . వేగంగా నడక, యోగా, తేలికపాటి బలం వ్యాయామాలు రక్తప్రసరణను మెరుగుపరుస్తాయి, గుండెను బలపరుస్తాయి. మెనోపాజ్ సమయంలో భావోద్వేగ మార్పులు ఎక్కువగా వస్తాయి. లోతైన శ్వాస, ధ్యానం, విశ్రాంతి సమయం కేటాయించడం హార్మోన్లతో పాటు గుండె ఆరోగ్యాన్ని కూడా కాపాడుతుంది.
హార్మోన్ రీప్లేస్మెంట్ థెరపీ (HRT) కొంతమందికి హార్మోన్ సమతుల్యాన్ని మరియు ఎముక-గుండె ఆరోగ్యాన్ని మెరుగుపరచవచ్చు. ఇది అందరికీ సరిపోకపోయినా, డాక్టర్ సలహాతో పరిశీలించదగిన అంశం. మెనోపాజ్ను కేవలం ప్రసూతి దశ ముగింపుగా కాకుండా, గుండె ఆరోగ్యానికి కొత్త మైలురాయిగా చూడాలి అని డాక్టర్లు చెబుతున్నారు. హార్మోన్లు మారినా, మీ గుండెను రక్షించే శక్తి మీ చేతుల్లోనే ఉంది. అవగాహన, క్రమమైన తనిఖీలు, చిన్న జీవనశైలి మార్పులతో మెనోపాజ్ తర్వాత జీవితం ఎక్కువకాలం, ఆరోగ్యంగా సాగుతుంది అని చెబుతున్నారు.