ఆధ్యాత్మికత ముసుగులో యువతులను నమ్మించి, వారిని దారుణంగా లైంగికంగా దోపిడీ చేస్తూ.. ఆపై బ్లాక్మెయిలింగ్కు పాల్పడుతున్న ఒక కిరాతక నకిలీ బాబా గుట్టును మథుర పోలీసులు రట్టు చేశారు. 29 ఏళ్ల వయసున్న ఈ నిందితుడు మరెవరో కాదు, దేశంలోనే అత్యంత ప్రతిష్టాత్మకమైన ఐఐటీ రూర్కీ (IIT Roorkee) నుండి మెకానికల్ ఇంజనీరింగ్ పట్టా పొందిన ఉన్నత విద్యావంతుడు కావడం గమనార్హం. ఒడిశాకు చెందిన అభిషేక్ మిశ్రా అనే ఈ నిందితుడు, తన పేరును “ఆదికర్త నారాయణ దాస్” గా మార్చుకుని మథురలో ఈ ఘాతుకాలకు పాల్పడుతున్నాడు. ఛత్తీస్గఢ్కు చెందిన ఒక యువతి ధైర్యంగా ఇచ్చిన ఫిర్యాదుతో పోలీసులు అతడిని అరెస్ట్ చేసి, అత్యాచారం, బ్లాక్మెయిలింగ్ కింద కేసులు నమోదు చేశారు.
పోలీసుల విచారణ ప్రకారం.. అభిషేక్ మిశ్రా గత నాలుగేళ్లుగా మథురలోని రాధాకుంజ్ ప్రాంతంలో నివసిస్తూ తనను తాను ఒక గొప్ప ‘కథావాచక్’ (ఆధ్యాత్మిక కథకుడు) గా ప్రచారం చేసుకున్నాడు. దీనికోసం “రాధా కృప అమృత” (Radha Kripa Amrita) అనే యూట్యూబ్ ఛానెల్ని ప్రారంభించి, హిందీ, ఇంగ్లీష్ భాషల్లో అద్భుతమైన ప్రవచనాలు చెబుతూ లక్షలాది మంది ఫాలోవర్లను సంపాదించుకున్నాడు. అంతటితో ఆగకుండా, ప్రొఫెషనల్ నెట్వర్కింగ్ ప్లాట్ఫారమ్ అయిన ‘లింక్డ్ఇన్’ (LinkedIn) లో కూడా తన నకిలీ ఆధ్యాత్మిక పేరుతో ప్రొఫైల్ నిర్వహించేవాడు. వీటి ద్వారా ముఖ్యంగా ఇంజనీరింగ్ బ్యాక్గ్రౌండ్ ఉన్న చదువుకున్న యువతులను టార్గెట్ చేసి, వారితో చాటింగ్లు చేస్తూ తన వైపు తిప్పుకునేవాడు.
ఈ నకిలీ బాబా మాటలు నమ్మి, తమ కుటుంబాలను వదిలేసి వచ్చిన దాదాపు 24 మంది యువతీ యువకులు మథురలోని ఇతని ఇంట్లోనే కలిసి ఉండేవారు. ఒకసారి యువతులు తన పూర్తి ఆధీనంలోకి వచ్చాక, వారికి గాంధర్వ వివాహం (పరస్పర అంగీకారంతో చేసుకునే ప్రాచీన వివాహ పద్ధతి) పేరుతో నమ్మబలికి లైంగిక దోపిడీకి తెరలేపేవాడు. దేవుడి ప్రసాదం అంటూ మత్తుమందు కలిపిన పాలు (Spiked Milk) వారిచేత తాగించి.. ఆపై స్పృహ తప్పిన యువతులపై అత్యాచారం చేసి, వాటిని తన మొబైల్ ఫోన్ లో వీడియోలు, ఫోటోలు రికార్డ్ చేసేవాడు. ఆ అశ్లీల విజువల్స్ చూపించి బాధితులను, వారి కుటుంబాలను భయపెడుతూ భారీగా డబ్బులు వసూలు చేసేవాడు.
నిందితుడి వికృత చేష్టలు భరించలేక అతని సొంత తల్లి కూడా కొన్నాళ్ల క్రితమే ఇల్లు వదిలి వెళ్లిపోయింది. ఒక యువతి కుటుంబ సభ్యులు వచ్చి ఆమెను తీసుకెళ్లడానికి ప్రయత్నించినప్పుడు అభిషేక్ పెద్ద రచ్చ చేశాడు. నిందితుడి మొబైల్ ఫోన్ నుండి పోలీసులు అసంఖ్యాకమైన నగ్న ఫోటోలు, వీడియోలను రికార్డ్ చేసిన సాక్ష్యాలను స్వాధీనం చేసుకున్నారు. చదువుకున్న నైపుణ్యంతో యువతుల మైండ్ వాష్ (Brainwash) చేసి వారి నమ్మకంతో ఆడుకున్న ఈ ఐఐటీ బాబా చేతిలో ఇంకా ఎంతమంది అమ్మాయిలు మోసపోయారనే కోణంలో పోలీసులు ప్రస్తుతం లోతుగా విచారణ జరుపుతున్నారు.