రోజుకు ఎన్ని కప్పుల కాఫీ..బెటర్‌ తెలుసా?

అమెరికన్ హార్ట్ అసోసియేషన్ (AHA) విడుదల చేసిన ఒక నూతన శాస్త్రీయ నివేదిక ప్రకారం చాలామంది పెద్దలు గుండె సంబంధిత ప్రమాదాలు లేకుండా రోజుకు 400 మిల్లీగ్రాముల కేఫీన్‌ను (సుమారు 5 కప్పుల కాఫీ) సురక్షితంగా తీసుకోవచ్చని తేలింది. తగినంత పరిమాణంలో కాఫీ తాగడం వల్ల కొన్ని రకాల గుండె జబ్బుల ప్రమాదం తగ్గే అవకాశం ఉందని కూడా ఈ పరిశోధన పేర్కొంది.

ఈ అధ్యయనం పంచదార లేదా క్రీమ్ కలపని బ్లాక్ కాఫీని రోజుకు 400 మి.గ్రా వరకు తీసుకోవడం వల్ల గుండె జబ్బులు, హార్ట్ ఫెయిల్యూర్ మరియు పక్షవాతం (స్ట్రోక్) వచ్చే ప్రమాదం తగ్గుతుందని వెల్లడించింది. రోజుకు 400 మి.గ్రా వరకు కేఫీన్ తీసుకోవడం సురక్షితమే. అయితే ఎనర్జీ డ్రింక్స్ వంటి వాటి ద్వారా ఎక్కువ మొత్తంలో తీసుకునే కేఫీన్ గుండెకు హాని కలిగిస్తుంది కాబట్టి వాటిని నివారించాలి అని నిపుణులు చెబుతున్నారు.

రోజుకు 2 నుండి 4 కప్పుల కాఫీ తాగడం వల్ల గుండె జబ్బులు మరియు పక్షవాతం ప్రమాదం తగ్గుతుందని అధ్యయనంలో తేలింది.చక్కెర, క్రీమ్‌లు కలపకుండా తాగే బ్లాక్ కాఫీ టైప్-2 డయాబెటిస్ మరియు కొన్ని గుండె రక్తనాళాల సమస్యల ప్రమాదాన్ని తగ్గిస్తుంది.కేఫీన్ ప్రభావం వ్యక్తిని బట్టి మారుతుంది. కొందరిలో ఇది తాత్కాలికంగా రక్తపోటు, గుండె స్పందనల వేగాన్ని పెంచడం లేదా నిద్రలేమి, ఆందోళన వంటి సమస్యలకు కారణం కావచ్చు.

కాఫీలోని యాంటీఆక్సిడెంట్లు మరియు ఇతర సహజ గుణాలు కూడా గుండె ఆరోగ్యానికి మేలు చేస్తాయని నిపుణులు భావిస్తున్నారు.