బెంగళూరులో సంచలనం సృష్టించిన రేణుకాస్వామి హత్య కేసులో కీలక మలుపులు చోటుచేసుకున్నాయి. ఈ కేసులో అప్రూవర్‌గా మారిన ప్రదోశ్‌ రావు కోర్టు ముందు సంచలన వాంగ్మూలం ఇచ్చాడు. ఇందులో ప్రముఖ కన్నడ నటుడు దర్శన్, నటి పవిత్రా గౌడల పాత్రను అతడు వివరంగా బయటపెట్టాడు. మొత్తం 59 పేజీల్లో 100 పేరాల సమాచారాన్ని అతడు దస్త్రాల్లో నమోదు చేయించాడు.
ప్రదోశ్‌ వాంగ్మూలం ప్రకారం పట్టణగెరె షెడ్డులో దాడి జరిగిన తర్వాత దర్శన్, పవిత్ర తమ ఇంటికి వెళ్లిపోయారు. ఆ తర్వాత రేణుకాస్వామి మృతి చెందిన వార్తను సహ నిందితులు దర్శన్‌కు చేరవేశారు. ఆ సమాచారం వినగానే దర్శన్ తీవ్ర భయాందోళనకు గురయ్యాడు. నేరాన్ని ఎవరైనా తమపై వేసుకోకపోతే రివాల్వర్‌తో కాల్చుకుంటానని బెదిరించాడు. లేదా ఉరివేసుకుని చనిపోతానని ఆందోళన వ్యక్తం చేశాడు.
నేరాన్ని తమపై వేసుకునే వారికి భారీగా నగదు ఇచ్చేందుకు దర్శన్ సిద్ధపడ్డాడు. కార్తిక్, నిఖిల్‌ అనే ఇద్దరు యువకులు ఈ నేరాన్ని ఒప్పుకోవడానికి ముందుకొచ్చారు. దీంతో వారికి ఒక్కొక్కరికి రూ.5 లక్షల చొప్పున మొత్తం రూ.10 లక్షల బయానాను దర్శన్ తన నివాసంలోనే ఇచ్చాడు. అలాగే రేణుకాస్వామిని అపహరించిన రాఘవేంద్రకు అదనంగా మరో రూ.5 లక్షలు అందించాడు.
మృతదేహాన్ని పారవేసేందుకు నిందితులు కెంగేరి, నాగరబావి తదితర ప్రాంతాల్లో తిరిగారు. చివరకు మాళగాళలోని రాజకాలువ సమీపంలో మృతదేహాన్ని పడేశారు. లొంగిపోయేందుకు వచ్చిన యువకులకు నిందితులు ఓ కట్టుకథను నేర్పించారు. నగదు లావాదేవీల వల్లే కొట్టామని పోలీసుల ముందు వారు చెప్పారు.
అయితే మర్మావయవాలపై దాడి ఎందుకు జరిగిందనే అంశంపై పోలీసులు ప్రశ్నించగా అసలు గుట్టు రట్టయింది. పోలీసులు తమదైన శైలిలో విచారించడంతో వారు నిజాన్ని వెల్లడించారు. అనంతరం మైసూరులో దర్శన్‌ను పోలీసులు అరెస్టు చేశారు. ప్రదోశ్‌ ఇచ్చిన పూర్తి వాంగ్మూలంతో దర్శన్ చుట్టూ ఉచ్చు మరింత బిగుస్తోంది.