టీమ్ఇండియా యువ ఆటగాడు నమన్ ధిర్ తన జాతీయ జట్టు ప్రయాణం, కోచ్ గౌతమ్ గంభీర్ శిక్షణ విధానాలపై ఆసక్తికర విషయాలను పంచుకున్నాడు. వెస్టిండీస్తో జరిగిన వన్డే సిరీస్ ద్వారా అంతర్జాతీయ క్రికెట్లోకి అడుగుపెట్టిన నమన్, ఆ తర్వాత న్యూజిలాండ్పైనా అద్భుత ప్రతిభ కనబరిచాడు. లోయర్ ఆర్డర్లో కీలక పరుగులు సాధించి జట్టు విజయాల్లో తనవంతు పాత్ర పోషించాడు. తాజాగా ఓ ఆంగ్ల వెబ్సైట్కు ఇచ్చిన ఇంటర్వ్యూలో నమన్ పలు విషయాలు వెల్లడించాడు.
భారత జట్టుకు ఆడే అవకాశం ఇంత త్వరగా వస్తుందని తాను అస్సలు ఊహించలేదని నమన్ తెలిపాడు. వెస్టిండీస్ సిరీస్కు ఎంపికైనట్లు తెలిసినప్పుడు ఆశ్చర్యపోయానని చెప్పాడు. ఆ షాక్ నుంచి తేరుకోవడానికి తనకు రెండు రోజులు పట్టిందని వివరించాడు. ఒకసారి జట్టుతో కలిసిన తర్వాత అంతా సాధారణమైపోయిందని పేర్కొన్నాడు. న్యూజిలాండ్పై వన్డే, టీ20 సిరీస్లు గెలిచిన జట్టులో సభ్యుడిగా ఉండటం ఎంతో సంతోషాన్ని ఇచ్చిందన్నాడు. ఐపీఎల్లో వచ్చిన ప్రతి అవకాశాన్ని సద్వినియోగం చేసుకోవడం వల్లే నేడు భారత జట్టులో చోటు దక్కిందని నమన్ అభిప్రాయపడ్డాడు.
కోచ్ గౌతమ్ గంభీర్ కోచింగ్ స్టైల్ గురించి నమన్ ప్రత్యేకంగా ప్రస్తావించాడు. గంభీర్ ఎంతో నిక్కచ్చిగా, ముక్కుసూటిగా ఉంటారని తెలిపాడు. జట్టులో సీనియర్, జూనియర్ అనే తేడా లేకుండా ప్రతి ఒక్కరూ తమ బాధ్యతను సరిగ్గా నిర్వర్తించాలని ఆయన కోరుకుంటారని చెప్పాడు. మైదానంలో ఆటగాళ్లు తెలివైన నిర్ణయాలు తీసుకోవాలని గంభీర్ ఆశిస్తారని వివరించాడు.వ్యక్తిగతంగా సెంచరీ సాధించినా సరే, జట్టు గెలిచినప్పుడే గంభీర్ సంతోషిస్తారని నమన్ వెల్లడించాడు. ఒక మ్యాచ్ ముగిసిన వెంటనే దానిని మర్చిపోయి, తర్వాతి మ్యాచ్లో ఇంకా మెరుగ్గా ఆడాలని ఆయన ప్రోత్సహిస్తారని తెలిపాడు. ప్రతి కొత్త పోటీకి ఎప్పుడూ సిద్ధంగా ఉండాలని గంభీర్ సూచిస్తారని చెప్పాడు.
తాను పోషించే ఫినిషింగ్ పాత్ర ఎంతో సవాల్తో కూడుకున్నదని నమన్ పేర్కొన్నాడు. క్రీజులోకి వచ్చిన తొలి బంతి నుంచే దూకుడుగా ఆడాల్సి ఉంటుందని అన్నాడు. తనకు అలా ఆడటమే ఎంతో ఇష్టమని స్పష్టం చేశాడు. జట్టు అవసరాల మేరకు ఏ స్థానంలో బ్యాటింగ్ చేయడానికైనా తాను సిద్ధమని చెప్పాడు. ఒత్తిడి లేకుండా ప్రశాంతంగా ఉంటూ, స్మార్ట్గా ఆలోచిస్తే ఫినిషింగ్ బాధ్యతను సులభంగా పూర్తి చేయవచ్చని నమన్ ధిర్ ధీమా వ్యక్తం చేశాడు.

