గ్లోబల్ స్టార్ రామ్ చరణ్ హీరోగా, సంచలన దర్శకుడు బుచిబాబు సానా తెరకెక్కించిన ఈ పీరియాడిక్ రూరల్ స్పోర్ట్స్ యాక్షన్ డ్రామా ప్రపంచవ్యాప్తంగా థియేటర్లలోకి వచ్చి ఒక భారీ బ్లాక్బస్టర్ హిట్గా నిలిచింది. ‘ఆర్ఆర్ఆర్’ తర్వాత మెగా పవర్ స్టార్ రామ్ చరణ్ నుండి వచ్చిన పర్ఫెక్ట్ మాస్ కంబ్యాక్ ఫిల్మ్ ఇదేనంటూ థియేటర్ల వద్ద అభిమానులు పాలాభిషేకాలు, టపాసులతో పండగ చేసుకుంటున్నారు. ఈ నేపథ్యంలో, అందరూ ఎంతో ఆసక్తిగా ఎదురుచూస్తున్న ఈ సినిమా మొదటి రోజు అఫీషియల్ కలెక్షన్ల వివరాలను నిర్మాణ సంస్థ ‘వృద్ధి సినిమాస్’ తాజాగా అధికారికంగా ప్రకటించింది.
ప్రారంభ ట్రేడ్ అంచనాలను తలకిందులు చేస్తూ.. ‘పెద్ది’ చిత్రం ప్రపంచవ్యాప్తంగా మొదటి రోజే ఏకంగా రూ. 135.36 కోట్ల భారీ గ్రాస్ వసూలు చేసి ఇండియన్ సినిమా హిస్టరీలోనే వన్ ఆఫ్ ది బిగ్గెస్ట్ ఓపెనర్గా సరికొత్త రికార్డు సృష్టించింది. ఈ విషయాన్ని మేకర్స్ స్పష్టం చేస్తూ.. ‘బాక్సాఫీస్ ఛాంపియన్’ అంటూ ఒక అదిరిపోయే అఫీషియల్ కలెక్షన్ల పోస్టర్ను రిలీజ్ చేశారు. 1990ల నాటి పీరియాడిక్ కథాంశం, ఒళ్లు గగుర్పొడిచే యాక్షన్ సీక్వెన్స్, మరియు ఆస్కార్ విజేత ఏఆర్ రెహమాన్ అందించిన మైండ్ బ్లోయింగ్ బ్యాక్గ్రౌండ్ స్కోర్ థియేటర్లను ఊచకోత కోయడం వల్లే ఈ స్థాయి కలెక్షన్ల విధ్వంసం సాధ్యమైందని ట్రేడ్ అనలిస్ట్లు విశ్లేషిస్తున్నారు.
ఈ సినిమా కథాంశం విజయనగరం జిల్లాలోని ‘కొండ కింద ఊరు’ అనే ఒక వెనుకబడిన గ్రామం చుట్టూ తిరుగుతుంది. వందల మంది ప్రజలు అక్కడ జీవిస్తున్నప్పటికీ, ప్రభుత్వ రికార్డుల్లో ఆ ఊరికి ఎలాంటి గుర్తింపు, కనీసం ఒక రైల్వే స్టేషన్ కూడా ఉండదు. అందుకే ఆ ఊరి మనుషులన్నా, ఆ ప్రాంతమన్నా చుట్టుపక్కల వారికి తీవ్రమైన చిన్నచూపు. ఆ ఊరిలోనే పుట్టి పెరిగిన సాధారణ యువకుడే పెద్ది (రామ్ చరణ్). రోజూ టౌన్కు వెళ్లి కూలి పనులు చేసుకునే పెద్ది.. స్థానికంగా క్రికెట్ ఆటలో తిరుగులేని చిచ్చరపిడుగు. అతని సిక్సర్ల వేగానికి బొబ్బిలి, విజయనగరం క్రికెట్ జట్లు లోకల్ బెట్టింగ్ మ్యాచ్లలో పెద్దిని తమ వైపు తిప్పుకోవడానికి వేలంలో పోటీపడేంత రేంజ్లో రాటుదేలిపోతాడు.
అయితే, ప్రాణంగా ప్రేమించే క్రికెట్ ఆటను వదిలేసి పెద్ది హఠాత్తుగా మట్టి కుస్తీ (రెజ్లింగ్) క్రీడాకారుడిగా, ఆపై పారా ఒలింపిక్ రన్నర్గా ఎందుకు మారాల్సి వచ్చింది? తన సొంత ఊరి ఆత్మగౌరవం కోసం, ప్రభుత్వ రికార్డుల్లో గుర్తింపు తేవడం కోసం అతను చేసిన పోరాటం ఏంటి? ఈ ప్రయాణంలో అప్పలసూరి (జగపతిబాబు), గౌర్నాయుడు (శివరాజ్కుమార్) పాత్రలు పెద్ది జీవితాన్ని ఎలాంటి మలుపులు తిప్పాయి? అసలు ఈ కథలో అచ్చియమ్మ (జాన్వీ కపూర్) ప్రాధాన్యత ఏంటి? అనే ఆసక్తికరమైన ట్విస్టులతో బుచిబాబు ఈ చిత్రాన్ని అత్యంత హృదయవిదారకంగా, ఎమోషనల్ స్పోర్ట్స్ డ్రామాగా వెండితెరపై ఆవిష్కరించారు. ఈ వీకెండ్లో బాక్సాఫీస్ వద్ద ‘పెద్ది’ మరిన్ని సరికొత్త రికార్డులను బద్దలు కొట్టడం ఖాయంగా కనిపిస్తోంది.