జార్ఖండ్‌ రాజధాని రాంచీలోని హోత్వార్ జైలులో ఒక దారుణమైన ఘటన వెలుగు చూసింది. ఒక కేసులో అరెస్టై రిమాండ్‌లో ఉన్న 20 ఏళ్ల యువకుడిని తోటి ఖైదీలు తీవ్రంగా వేధించారు. పండుగల సమయాలలో అతడికి బలవంతంగా చీర కట్టించారు. ఆ యువకుడిపై లైంగిక దాడికి పాల్పడ్డారు.
మహాశివరాత్రి, శ్రీరామనవమి, సర్హుల్ పండుగల సమయంలో నిందితులు ఈ అఘాయిత్యానికి పాల్పడ్డారు. బాధితుడికి మత్తుమందు ఇచ్చి మూడుసార్లు అత్యాచారం చేశారు. ఈ దారుణం వల్ల యువకుడు తీవ్రంగా గాయపడి రక్తం కారినప్పటికీ జైలు అధికారులు పట్టించుకోలేదు. వైద్య చికిత్స అందించకపోగా, అతడి ఫిర్యాదు లేఖను సైతం చించివేశారు.
ఈ ఏడాది జూన్ 12న కోర్టు ఆ యువకుడిని నిర్దోషిగా విడుదల చేసింది. జైలు నుంచి బయటకు వచ్చిన తర్వాత బాధితుడు తన కుటుంబ సభ్యులతో జరిగిన విషయాన్ని చెప్పాడు. దీంతో అతడి తండ్రి పోలీసులకు ఫిర్యాదు చేశారు.
ఈ ఘటనపై పోలీసులు తీవ్రంగా స్పందించారు. జైలు సూపరింటెండెంట్, వైద్య అధికారి, వార్డు ఇన్‌చార్జ్‌తో పాటు పలువురు ఖైదీలు సహా మొత్తం 19 మందిపై కేసు నమోదు చేశారు. ఈ ఆరోపణలపై పోలీసులు ప్రస్తుతం దర్యాప్తు ముమ్మరం చేశారు. జైళ్లలో భద్రత, అధికారుల నిర్లక్ష్యంపై ఈ ఘటన తీవ్ర విమర్శలకు దారితీసింది.