ఆసియా గేమ్స్ మహిళల క్రికెట్లో భారత మహిళల జట్టు అద్భుత ప్రదర్శన కనబరిచింది. క్వార్టర్ ఫైనల్ మ్యాచ్లో పసికూన జపాన్పై అలవోక విజయం సాధించి సెమీఫైన్లలోకి దూసుకెళ్లింది. ఈ మ్యాచ్లో అఖండ విజయం సాధించిన టీమ్ఇండియా సెమీస్ పోరుకు సిద్ధమైంది. సెమీస్లో బంగ్లాదేశ్తో భారత జట్టు తలపడనుంది. ఈ కీలక మ్యాచ్ ఆదివారం జరగనుంది.
ఈ మ్యాచ్లో టాస్ ఓడి తొలుత బ్యాటింగ్ చేసిన జపాన్ జట్టు తక్కువ పరుగులకే చుట్టూ మునిగింది. జపాన్ బ్యాటర్లలో ఓపెనర్ అయకా కటో (25), హరున ఇవాసాకి (10) మాత్రమే రెండంకెల స్కోరు సాధించారు. మిగతా బ్యాటర్లంతా విఫలమయ్యారు. తెలుగు అమ్మాయి శ్రీ చరణి అద్భుతమైన బౌలింగ్తో ప్రత్యర్థి జట్టును కోలుకోకుండా దెబ్బతీసింది. కేవలం 10 పరుగులు ఇచ్చి 4 వికెట్లు పడగొట్టింది. ఆమెతో పాటు షఫాలీ వర్మ 2 వికెట్లు తీయగా, శ్రేయాంకా పాటిల్, దీప్తి శర్మ తలో వికెట్ దక్కించుకున్నారు. దీంతో జపాన్ జట్టు 19.5 ఓవర్లలో కేవలం 57 పరుగులకే కుప్పకూలింది.
అనంతరం 58 పరుగుల స్వల్ప లక్ష్యంతో బరిలోకి దిగిన భారత జట్టు సునాయసంగా విజయం సాధించింది. ఓపెనర్ షఫాలీ వర్మ మెరుపు ఇన్నింగ్స్తో చెలరేగింది. కేవలం 15 బంతుల్లోనే 6 ఫోర్లు, 2 సిక్సర్లతో 40 పరుగులు చేసి అజేయంగా నిలిచింది. కమలిని (0), భారతి (6) నిరాశపరిచినా, షఫాలీతో కలిసి రిచా ఘోష్ (12*) మ్యాచ్ను విజయవంతంగా ముగించారు. జపాన్ బౌలర్లలో నొనొవో, అయక చెరో వికెట్ తీశారు. కేవలం 5 ఓవర్లలోనే కేవలం 2 వికెట్లు కోల్పోయి భారత్ లక్ష్యాన్ని ఛేదించింది.
మరోవైపు మలేషియాతో జరిగిన క్వార్టర్ ఫైనల్ మ్యాచ్లో శ్రీలంక ఘన విజయం సాధించింది. తొలుత బ్యాటింగ్ చేసిన లంక నిర్ణీత ఓవర్లలో 160/4 పరుగులు చేసింది. లక్ష్య చేధనలో మలేషియా 74 పరుగులకే ఆలైటైంది. దీంతో ఆదివారం జరిగే మరో సెమీస్లో పాకిస్థాన్తో శ్రీలంక తలపడనుంది. టోర్నీలో ఫైనల్, మూడో స్థానం కోసం జరిగే మ్యాచ్లు మంగళవారం జరగనున్నాయి.