రాజస్థాన్లోని టోంక్ జిల్లాలో ఒక విచిత్రమైన ఘటన చోటుచేసుకుంది. స్థానిక పంచాయతీ సమితి ఎన్నికల్లో ఓడిపోవడంతో ఓ అభ్యర్థి కోపంతో ఊగిపోయారు. ఎన్నికలకు ముందు తాను ఏర్పాటు చేసిన వీధి దీపాలను (Street Lamps) రాత్రికి రాత్రే తొలగించారు.
రాజస్థాన్లోని పలు గ్రామాల్లో ఇటీవల పంచాయతీ సమితి ఎన్నికలు జరిగాయి. నివాయి ఎమ్మెల్యే రామ్సహాయ్ వర్మ వద్ద వ్యక్తిగత సహాయకుడిగా పనిచేసే అలోక్ శర్మ రనోలి భార్య ప్రియాంక శర్మ ఈ ఎన్నికల్లో పోటీ చేశారు. భాజపా తరఫున 4వ వార్డు నుంచి ఆమె బరిలో నిలిచారు. ఎన్నికల ప్రచార సమయంలో ఓటర్లను ఆకట్టుకునేందుకు ఆయన సుమారు 50 ఎల్ఈడీ వీధి దీపాలను ఏర్పాటు చేశారు.
అయితే, ఈ ఎన్నికల్లో ప్రియాంక శర్మ ఓటమిపాలయ్యారు. తన భార్య ఓడిపోవడాన్ని అలోక్ శర్మ జీర్ణించుకోలేకపోయారు. ఓటర్లపై కోపంతో ఆయన మనుషులు రంగంలోకి దిగారు. గ్రామాల్లో ఏర్పాటు చేసిన వీధి దీపాలలో పది లైట్లను వెంటనే తొలగించారు. ఓట్లేయకపోతే వీధి దీపాలు కూడా ఉండవంటూ పరోక్షంగా నిరసన తెలిపారు.
ఈ ఘటనపై స్థానికులు తీవ్ర ఆగ్రహం వ్యక్తం చేశారు. ఓటమి భారాన్ని మోయలేక ఇలా చిన్నచూపు చూడటం సరికాదని మండిపడ్డారు. మరోవైపు ఈ ఆరోపణలను ఎమ్మెల్యే రామ్సహాయ్ వర్మ పూర్తిగా తోసిపుచ్చారు. ఎన్నికల్లో ఓడిపోవడం వల్లే లైట్లు తీయలేదని స్పష్టం చేశారు. దీపావళికి ముందు వాటిని ఏర్పాటు చేశామని, విద్యుత్ బిల్లుల సమస్య కారణంగానే వాటిని తొలగించాల్సి వచ్చిందని వివరణ ఇచ్చారు.
విద్యుత్ శాఖ అధికారులు కూడా స్పందిస్తూ అనధికారిక కనెక్షన్ల కారణంగానే దీపాలు తొలగించామని తెలిపారు. స్థానికుల నుంచి అభ్యర్ధన రావడంతో మిగిలిన లైట్ల తొలగింపును నిలిపివేశామన్నారు. కొత్తగా ఎన్నికైన సర్పంచులు బిల్లులు చెల్లించేందుకు ముందుకు రావడంతో వివాదం సద్దుమణిగింది. అయినప్పటికీ, ఎన్నికల ఫలితాలొచ్చిన వెంటనే ఈ విధంగా లైట్లు తొలగించడం రాష్ట్రవ్యాప్తంగా కలకలం రేపింది. ప్రజాస్వామ్యంలో గెలుపోటములు సహజమని, ఇలా కక్ష సాధింపు చర్యలకు పాల్పడటం సరైన పద్ధతి కాదని ప్రజలు విమర్శిస్తున్నారు. ఈ ఘటనపై అధికారులు మరింత విచారణ జరుపుతున్నారు.

