చెన్నైలోని లీలా ప్యాలెస్‌లో వైఎస్ అనిల్ రెడ్డి కుమార్తె వివాహ వేడుక అత్యంత వైభవంగా జరిగింది. వైఎస్ రాజశేఖరరెడ్డి సోదరుడు వైఎస్ జార్జిరెడ్డి కుమారుడు వైఎస్ అనిల్ రెడ్డి, మాలిని దంపతుల కుమార్తె శ్రేయరెడ్డి వివాహం ఉజ్వల్‌తో జరిగింది. ఈ వేడుకకు పలువురు ప్రముఖులు హాజరై కొత్త జంటను ఆశీర్వదించారు.
ఈ వివాహ మహోత్సవానికి వైయస్సార్‌సీపీ అధ్యక్షుడు, మాజీ ముఖ్యమంత్రి వైఎస్ జగన్‌మోహన్ రెడ్డి దంపతులు విచ్చేశారు. నూతన వధూవరులను అక్కున చేర్చుకుని అభినందనలు తెలిపారు. వైఎస్ జగన్ చెన్నైకి వస్తున్నారని తెలుసుకుని అభిమానులు ఘన స్వాగతం పలికారు.
ఈ వేడుకలో రాజకీయ, సినీ రంగాలకు చెందిన దిగ్గజాలు ఒక్కచోట చేరారు. తమిళనాడు ముఖ్యమంత్రి జోసెఫ్ విజయ్, ప్రముఖ నటి త్రిష ఈ వివాహానికి హాజరయ్యారు. అలాగే ప్రముఖ పారిశ్రామికవేత్త గౌతమ్ అదానీ దంపతులు, బీఆర్ఎస్ వర్కింగ్ ప్రెసిడెంట్ కేటీఆర్ దంపతులు కూడా విచ్చేశారు.
ఈ వేడుకలో వైయస్సార్‌సీపీ నేత, మాజీ మంత్రి పెద్దిరెడ్డి రామచంద్రారెడ్డి, ఎంపీ మిథున్ రెడ్డి తదితరులు పాల్గొన్నారు. ప్రముఖుల రాకతో లీలా ప్యాలెస్ ప్రాంగణం చాలా సందడిగా మారింది. రాజకీయ, వ్యాపార రంగాల ప్రముఖులు ఒకే వేదికపైకి రావడంతో ఈ వివాహం ప్రత్యేక ఆకర్షణగా నిలిచింది.