అనంతపురం జిల్లా రాప్తాడు జెడ్పీ ఉన్నత పాఠశాలలో జరిగిన ఘటనపై వైఎస్సార్‌సీపీ అధ్యక్షుడు వైఎస్ జగన్‌మోహన్‌రెడ్డి తీవ్ర దిగ్భ్రాంతి వ్యక్తం చేశారు. పదో తరగతి విద్యార్థినిపై జరిగిన దాడిని ఆయన తీవ్రంగా ఖండించారు. ఈ మేరకు ఆయన సామాజిక మాధ్యమం ‘ఎక్స్’ వేదికగా స్పందించారు.
పాఠశాల తరగతి గదిలోకి చొరబడి విద్యార్థినిపై దాడి చేయడం అత్యంత దారుణమని ఆయన పేర్కొన్నారు. విద్యాలయాల్లో కూడా విద్యార్థులకు భద్రత కల్పించడంలో కూటమి ప్రభుత్వం విఫలమైందని మండిపడ్డారు. రాష్ట్రంలో శాంతిభద్రతలు పూర్తిగా కుప్పకూలాయని ఆయన ఆరోపించారు. ప్రభుత్వ పాఠశాలలోకి ఒక దుండగుడు ఇంత సులభంగా ఎలా ప్రవేశించాడో ప్రభుత్వం సమాధానం చెప్పాలని నిలదీశారు.
ఈ దాడిని అడ్డుకునే ప్రయత్నం చేసిన మరో విద్యార్థిని కూడా గాయపడటం బాధాకరమని అన్నారు. రాష్ట్రంలో పాలనను గాలికొదిలేశారని విమర్శించారు. నేరస్థులకు చట్టం అంటే భయం లేకుండా పోయిందని తెలిపారు. రాజకీయ కక్షసాధింపులకే ప్రభుత్వం ప్రాధాన్యత ఇస్తోందని మండిపడ్డారు.
గాయపడిన విద్యార్థినులకు వెంటనే అత్యుత్తమ వైద్య సేవలు అందించాలని డిమాండ్ చేశారు. బాధిత కుటుంబాలకు ప్రభుత్వం పూర్తి భరోసా కల్పించాలని కోరారు. ఈ ఘటనపై పారదర్శకమైన విచారణ జరపాలని స్పష్టం చేశారు. నిందితుడిపై కఠిన చట్టపరమైన చర్యలు తీసుకోవాలని చెప్పారు.
రాష్ట్రవ్యాప్తంగా అన్ని పాఠశాలల్లో భద్రతా ఏర్పాట్లను తక్షణమే సమీక్షించాలని ఆయన సూచించారు. పాఠశాలల్లో చదువుకునే పిల్లలకు రక్షణ కల్పించే బాధ్యత ప్రభుత్వంపై ఉందని గుర్తుచేశారు. ఈ తీవ్ర ఘటనకు ముఖ్యమంత్రి చంద్రబాబు నాయుడు, విద్యాశాఖ మంత్రి నారా లోకేష్ బాధ్యత వహించాలని జగన్ డిమాండ్ చేశారు.