 చిత్ర షూటింగ్ ప్రస్తుతం కాకినాడ పోర్టులో జరుగుతోంది.){kind=link}
గోపిచంద్ మలినేని దర్శకత్వంలో తెరకెక్కుతున్న #NBK111 (వర్కింగ్ టైటిల్) చిత్ర షూటింగ్ ప్రస్తుతం కాకినాడ పోర్టులో జరుగుతోంది. నటుడు, హిందూపురం ఎమ్మెల్యే నందమూరి బాలకృష్ణ ప్రమాదవశాత్తు గాయపడ్డారు. ఈ భారీ యాక్షన్ చిత్రంలో నటుడు మంచు మనోజ్, బాలకృష్ణ మధ్య కీలకమైన పోరాట సన్నివేశాలను చిత్రీకరిస్తుండగా ఈ ప్రమాదం చోటుచేసుకుంది. వెంటనే అప్రమత్తమైన చిత్ర బృందం షూటింగ్ను నిలిపివేసింది.
ఈ యాక్షన్ సీక్వెన్స్లో బాలకృష్ణ మోకాలికి స్వల్ప గాయమైంది. అక్కడికక్కడే వైద్యులు ప్రాథమిక చికిత్స అందించినప్పటికీ, మెరుగైన పరీక్షల కోసం ఆయనను కాకినాడలోని ఓ ప్రైవేటు ఆసుపత్రికి తరలించారు. స్కానింగ్ మరియు వైద్య పరీక్షల అనంతరం మోకాలికి చిన్నపాటి మజిల్ టియర్ అయినట్లు గుర్తించారు. ఆయన త్వరగా కోలుకోవడానికి వైద్యుల సూచన మేరకు ఒక చిన్న మైనర్ సర్జరీ చేయాల్సి ఉందని సమాచారం.
బాలయ్య గాయపడ్డారన్న వార్త తెలియడంతో అభిమానులు ఆందోళనకు గురయ్యారు. అయితే దీనిపై దర్శకుడు గోపిచంద్ మలినేని ‘ఎక్స్’ వేదికగా స్పందిస్తూ స్పష్టతనిచ్చారు. ‘‘కాకినాడలో షూటింగ్ సమయంలో బాలకృష్ణ గారికి చిన్న మజిల్ టియర్ అయింది. వైద్యుల సూచన మేరకు ఒక మైనర్ సర్జరీ చేయాల్సి ఉంది. సినిమాపై ఆయనకున్న క్రమశిక్షణ, అంకితభావం మా అందరికీ ఎంతో స్ఫూర్తినిస్తుంది. అభిమానులు ఎవరూ ఆందోళన చెందాల్సిన అవసరం లేదు. ఆయన త్వరలోనే కోలుకుని షూటింగ్కు తిరిగొస్తారు’’ అని పేర్కొన్నారు.
‘వీర సింహారెడ్డి’ వంటి బ్లాక్బస్టర్ తర్వాత బాలకృష్ణ, గోపిచంద్ మలినేని కాంబినేషన్లో వస్తున్న ఈ సినిమాపై భారీ అంచనాలున్నాయి. వృద్ధి సినిమాస్ పతాకంపై వెంకట సతీశ్ కిలారు నిర్మిస్తున్న ఈ చిత్రం ముంబై నేపథ్యంలో సాగే హై-వోల్టేజ్ మాస్ యాక్షన్ ఎంటర్టైనర్గా రూపుదిద్దుకుంటోంది. ఇందులో బాలయ్య గ్యాంగ్స్టర్ తరహా పవర్ఫుల్ రోల్లో కనిపించనుండగా, ఆయన సరసన కాజల్ అగర్వాల్ నటిస్తున్నారు. ప్రస్తుతం శస్త్రచికిత్స నిమిత్తం బాలకృష్ణ విశ్రాంతి తీసుకుంటుండగా, ఆయన త్వరగా కోలుకోవాలని అభిమానులు ప్రార్థిస్తున్నారు.