ఇజ్రాయెల్ శనివారం తెల్లవారుజామున ఇరాన్పై భారీ దాడులు ప్రారంభించింది. కనీసం 30 లక్ష్యాలను టార్గెట్ చేసినట్లు సమాచారం. క్వామ్, ఇస్ఫహాన్ ప్రాంతాల్లోని సైనిక స్థావరాలు, ఇరాన్ ఇంటెలిజెన్స్ మంత్రిత్వ శాఖ, రక్షణ మంత్రిత్వ శాఖ, పార్చిన్ సైనిక సముదాయం, ఇరానియన్ అటామిక్ ఎనర్జీ ఏజెన్సీ కేంద్రాలపై దాడులు జరిగినట్లు తెలుస్తోంది.
ఇరాన్ రాజధాని టెహ్రాన్ నగర కేంద్రంలో భారీ పేలుడు సంభవించి దట్టమైన పొగ ఎగిసిపడినట్లు ప్రత్యక్ష సాక్షులు తెలిపారు. ఇరాన్ ప్రభుత్వ టెలివిజన్ పేలుడు జరిగినట్టు ధృవీకరించినప్పటికీ, నష్టం లేదా ప్రాణనష్టం వివరాలు వెల్లడించలేదు. ఇరాన్ అణు కార్యక్రమంపై ఇప్పటికే అమెరికాతో ఉద్రిక్తతలు ఉన్న సమయంలో ఈ దాడులు చోటుచేసుకోవడం గమనార్హం.
ఇజ్రాయెల్ డిఫెన్స్ ఫోర్సెస్ పశ్చిమ ఇరాన్లోని ఉర్మియా ప్రాంతంపై దాడులు చేస్తున్నట్లు ప్రకటించిన కొద్దిసేపటికే అక్కడ కూడా పేలుళ్లు సంభవించాయి. అంతర్జాతీయ వార్తా సంస్థల ప్రకారం ఖతార్ రాజధాని దోహా ఆకాశంలో కూడా పేలుళ్ల శబ్దాలు వినిపించాయి.
ఇరాన్ ప్రతీకార దాడిలో భాగంగా బహ్రెయిన్లోని అమెరికా నౌకాదళ స్థావరానికి గణనీయమైన నష్టం జరిగిందని నివేదికలు చెబుతున్నాయి. భద్రతా ఆందోళనల నేపథ్యంలో ఖతార్, కువైట్, యునైటెడ్ అరబ్ ఎమిరేట్స్ తమ గగనతలాన్ని మూసివేశాయి. యుఎఈ రాజధాని అబుదాబిలో కూడా భారీ పేలుడు సంభవించినట్లు సమాచారం.
బహ్రెయిన్లో కూడా పేలుళ్లు నమోదయ్యాయి. అక్కడి అంతర్గత వ్యవహారాల మంత్రిత్వ శాఖ అత్యవసర హెచ్చరిక జారీ చేసి, ప్రజలు సమీప సురక్షిత ప్రదేశాలకు తరలాలని సూచించింది. ఇజ్రాయెల్ ప్రధాని నెతన్యాహు దేశాన్ని ఉద్దేశించి ప్రసంగిస్తూ, అమెరికాతో కలిసి “లయన్’స్ రోర్” అనే ఆపరేషన్ ప్రారంభించినట్లు తెలిపారు. ఇరాన్ అణు ఆయుధాలను పొందకుండా అడ్డుకోవడమే లక్ష్యమని చెప్పారు.
ఇరాన్ కూడా ప్రతిగా కనీసం 30 క్షిపణులు ప్రయోగించినట్లు సమాచారం. హైఫా సహా పలు ఇజ్రాయెల్ నగరాలు లక్ష్యంగా మారాయి.ఇజ్రాయెల్ గగనతలం మూసివేయడంతో ఢిల్లీ–తెల్ అవివ్ మధ్య నడిచే ఎయిర్ ఇండియా విమానం ముంబైకి మళ్లించబడింది.ఇదిలా ఉండగా, టెహ్రాన్లోని భారత ఎంబసీ
అక్కడి భారతీయులకు జాగ్రత్త సూచనలు జారీ చేసింది. అవసరం లేకుండా బయటకు వెళ్లవద్దని, స్థానిక అధికారుల మార్గదర్శకాలను తప్పనిసరిగా అనుసరించాలని సూచించింది. ప్రాంతీయ ఉద్రిక్తతల నేపథ్యంలో పరిస్థితులు వేగంగా మారుతున్నాయి.