ఆ సమయంలో తీవ్ర ఆర్థిక ఇబ్బందులు.. గుర్తుచేసుకున్న సూర్య!

టాలీవుడ్, కోలీవుడ్‌లో తనకంటూ ప్రత్యేకమైన గుర్తింపు తెచ్చుకున్న అగ్ర కథానాయకుడు సూర్య (Suriya), ఇటీవల ‘కరుప్పు’ (Karuppu) చిత్రంతో బాక్సాఫీస్ వద్ద ఘన విజయాన్ని అందుకున్న విషయం తెలిసిందే. సుమారు రూ. 300 కోట్లకు పైగా వసూళ్లతో ఈ సినిమా ఇండస్ట్రీలో సంచలనం సృష్టించింది. అయితే ఈ సినిమా విడుదలకు ముందు తాను ఎదుర్కొన్న గడ్డు పరిస్థితులు, తీవ్రమైన ఆర్థిక ఇబ్బందుల గురించి సూర్య తాజాగా ఓ ఆంగ్ల మీడియా ఇంటర్వ్యూలో మనసు విప్పి మాట్లాడారు. ఆ క్లిష్ట సమయంలో తన భార్య, ప్రముఖ నటి జ్యోతిక (Jyotika) తనకు ఏ విధంగా కొండంత అండగా నిలిచిందో ఆయన భావోద్వేగంతో గుర్తుచేసుకున్నారు.

‘‘కరుప్పు సినిమా విడుదలకు ముందు చివరి నిమిషంలో ఊహించని విధంగా తీవ్రమైన ఆర్థిక పరమైన, పంపిణీ సమస్యలు తలెత్తాయి. ఆ సమయంలో సినిమాను సజావుగా థియేటర్లలో ప్రదర్శించడం కోసం నేను భారీగా అదనపు రుణాలు తీసుకోవాల్సి వచ్చింది. అది మా కుటుంబానికి ఒక దశలో చాలా పెద్ద రిస్క్ అనిపించింది. కానీ, జ్యోతిక నా ప్రతిభపై, నా నిర్ణయంపై ఉంచిన అచంచలమైన నమ్మకమే నేను వెనకడుగు వేయకుండా ధైర్యంగా ముందడుగు వేసేలా చేసింది. ఆ కష్ట సమయంలో ఆమె నాకు వెన్నంటి నిలిచి పూర్తి మద్దతునిచ్చింది’’ అని సూర్య చెప్పుకొచ్చారు.

ఇదే ఇంటర్వ్యూలో జ్యోతిక స్పందిస్తూ.. ఆ సినిమా విజయానికి సంబంధించిన పూర్తి ఘనత మాత్రం కేవలం సూర్యకే చెందుతుందని నిరాడంబరంగా తెలిపారు. ‘‘మేము ఏ నిర్ణయమైనా సరే సంప్రదించుకుని కలిసే తీసుకుంటాం. మా వ్యక్తిగత జీవితంలోనూ, పిల్లల పెంపకం విషయంలోనూ మేమిద్దరం ఎప్పుడూ ఒకే అభిప్రాయంతో ఉంటాం. ముందుగా మేమిద్దరం కూర్చుని చర్చించుకున్నాకే, ఆ విషయాలను పిల్లలకు వివరిస్తాం’’ అని ఆమె వెల్లడించారు.

ఇక ‘కరుప్పు’ సినిమా గురించి సూర్య మాట్లాడుతూ.. ఈ ప్రాజెక్ట్ కోసం దర్శకుడు ఆర్‌.జే బాలాజీ దాదాపు రెండున్నర సంవత్సరాలు ఎంతో కష్టపడ్డారని ప్రశంసించారు. ఈ సినిమా విజయం ఎంతో మంది జీవితాలను సానుకూలంగా మార్చేసిందని, ఆ సమయంలో తమకు అండగా నిలిచిన ఫైనాన్షియర్లకు కూడా కృతజ్ఞతలు తెలిపారు. సూర్య, త్రిష ప్రధాన పాత్రల్లో నటించిన ఈ సినిమాను మొదట మే 14న విడుదల చేయాలని ప్లాన్ చేశారు. అయితే చివరి నిమిషంలో తలెత్తిన ఫైనాన్షియల్ సమస్యల వల్ల విడుదల ఒక రోజు ఆలస్యమైంది. ఆ క్లిష్ట సమయంలో సూర్య స్వయంగా రంగంలోకి దిగి పెద్ద మొత్తంలో నిధులు సర్దుబాటు చేసి సినిమా విడుదలకు మార్గం సుగమం చేశారని అప్పట్లో వార్తలు వచ్చాయి. మొత్తానికి అన్ని అడ్డంకులను దాటుకుని వచ్చిన ఈ చిత్రం బాక్సాఫీస్ వద్ద రికార్డులను తిరగరాసింది.