నూతన దర్శకుడు భాస్కర్ బండి తెరకెక్కించిన ‘నాన్న నేను నా బాయ్ ఫ్రెండ్స్’ సినిమా.. ట్రైలర్స్, పోస్టర్లతోనే మంచి ఆసక్తిని కలిగించింది. ఈ సినిమా దిల్ రాజు సమర్పించడంతో మరింత క్రేజ్ ఏర్పడింది. ఈ రోజే ప్రేక్షకుల ముందుకొచ్చిన ఈ సినిమా ఎలా ఉందో ఇప్పుడు చూద్దాం
కథ :
ఉద్యోగం కోసం సిటీకొచ్చిన ఒక అమ్మాయి పద్మావతి (హెబ్బా పటేల్) పెద్దలు కుదిర్చిన పెళ్లి కాకుండా తనకిష్టమైన వాడిని ప్రేమించి పెళ్లి చేసుకోవాలనే ఉద్దేశ్యంతో ముగ్గురు అబ్బాయిల్ని ప్రేమిస్తుంది. ఆ ముగ్గురు అబ్బాయిలు గోకుల్ (నోయెల్), నాని (అశ్విన్), నమో (పార్వతీశం) కూడా పద్మావతిని ప్రాణంగా ప్రేమించి ఆమె కోసం జీవితంలో అన్నీ వదులుకోవడానికి సిద్దపడతారు. చివరికి పద్మావతి తనను ప్రాణంగా ప్రేమించే ముగ్గురు ప్రేమికుల్లో ఎవరిని పెళ్లి చేసుకోవాలో తెలీక కన్ఫ్యూజన్ లో పడిపోతుంది. అలాంటి పరిస్థితుల్లో ఉన్న పద్మావతిని ప్రాణంగా చూసుకునే ఆమె తండ్రి (రావు రమేష్) ఎలా అర్థం చేసుకున్నాడు ? పద్మావతిని ప్రేమించిన ఆ ముగ్గురు అబ్బాయిలు చివరికి ఎలా సర్దుకున్నారు ? పద్మావతి ఎవరిని పెళ్లి చేసుకుంది ? అనేదే ఈ సినిమా కథ.
ప్లస్ పాయింట్స్ :
ముందుగా ఈ సినిమాలో చెప్పుకోవాల్సిన ప్లస్ పాయింట్స్ రచయిత బి. సాయి కృష్ణ రాసుకున్న కథను గురించి. ముగ్గురు అబ్బాయిల్ని ఒక అమ్మాయి ప్రేమించడం అనే డిఫరేంట్ కథనే రాసుకున్నాడు. ఈ కథ ను దర్శకుడు బాగానే తెరకెక్కించాడు. ప్రధానంగా సెకండాఫ్ ప్రీ క్లైమాక్స్, క్లైమాక్స్ ఎపిసోడ్స్ లో వచ్చే సెంటిమెంట్ సీన్లు, కథలోని కీలక మలుపు బాగా ఆకట్టుకున్నాయి. హెబ్బా పటేల్ నటన, ఆమె ముగ్గురు అబ్బాయిల్ని ప్రేమించే సీన్స్ బాగున్నాయి. కూతురిని బాగా ప్రేమించే తండ్రి పాత్ర చాలా బాగుంది. ఫస్టాఫ్, సెకండాఫ్ లలో జబర్దస్త్ టీమ్ తో ట్రై చేసిన కామెడీ కూడా అక్కడక్కడా పండింది. పాటలు పర్వాలేదనిపించాయి. హెబ్బా పటేల్ ఫ్రెండ్ పాత్రలో తేజస్వి మడివాడ నటన ఆకట్టుకుంది.
మైనస్ పాయింట్స్ :
సినిమాలో హెబ్బా పటేల్, రావు రమేష్ ల క్యారెక్టర్ల ఎలివేషన్ బాగానే ఉన్నా.. హెబ్బా పటేల్ ముగ్గురు అబ్బాయిల్ని ప్రేమించే విధనం రొటీన్ గా ఉన్నాయి. పైగా అవి చాలా సాదా సీదాగా ఉండి అబ్బాయిలు మరీ అంత ఈజీగా ప్రేమలో పడిపోతారా అనిపించింది. ఫస్టాఫ్ లో స్క్రీన్ ప్లే స్లోగా ఉంది. ఇక డైరెక్టర్ సినిమాలో ఎమోషన్, కామెడీ, రొమాన్స్ అన్నీ ఉండాలనే ఉద్దేశ్యంతో అన్నింటినీ టచ్ చేసి చివరికి తండ్రి, కూతుళ్ళ ఎమోషన్, లవ్ మినహా రొమాన్స్, కామెడీని పూర్తి స్థాయిలో పండించలేకపోయాడు. ఫాదర్ – డాటర్ రిలేషన్ గొప్పగా చెప్పడమే డైరెక్టర్ ఉద్దేశ్యమైనప్పటికీ మిగిలిన అంశాలను అలా అసంపూర్తిగా వదిలేయడంతో కాస్త నిరుత్సాహం కలిగింది.
మొత్తంగా :
‘నాన్న నేను నా బాయ్ ఫ్రెండ్స్’ సినిమా అన్ని సినిమాలా రొటీన్ గా కాకుండా కాస్త భిన్నంగా బాగుంది. హెబ్బా పటేల్, రావు రమేష్ ల పాత్రలు, వాటి డైలాగులు, ప్రేమికుల మధ్య నడిచే కొన్ని లవ్ సీన్స్ , కొన్ని కామెడీ సన్నివేశాలు, ప్రీక్లైమాక్స్, క్లైమాక్స్ ఎమోషనల్ ఎపిసోడ్లు, కథలోని కీలక మలుపు సీన్స్ బాగున్నాయి. ఫస్టాఫ్ లో నడిచే కొన్ని రొటీన్, బోరింగ్ రొమాంటిక్, కామెడీ సీన్లు మైనస్ పాయింట్స్ గా ఉన్నాయి. లవ్ స్టోరీలను, ఫాదర్ సెంటిమెంట్ ఇష్టపడేవారికి ఈ సినిమా ఖచ్చితంగా నచ్చుతోంది.