సూపర్‌ స్టార్‌ రజనీకాంత్‌ సినిమా అంటే తమిళనాడుతో పాటు తెలుగు రాష్ట్రాల్లోనూ భారీ క్రేజ్‌ ఉంటుంది. అయితే రోబో తరువాత రజనీ హీరోగా తెరకెక్కిన సినిమాలేవి ఆశించిన స్థాయిలో ఆకట్టుకోలేకపోయాయి. పా.రంజిత్‌ దర్శకత్వంలో తెరకెక్కిన కాలా ప్రేక్షకులను ఏ మేరకు ఆకట్టుకుంది..? రజనీ మ్యాజిక్‌ రిపీట్‌ అయ్యిందా..? కబాలితో నిరాశపరిచిన పా.రంజిత్‌.. కాలాతో మెప్పించాడా..?
కథ : కరికాలా అలియాస్‌ కాలా (రజనీకాంత్‌) ముంబైలోని మురికివాడ ధారావీకి పెద్ద దిక్కు. అక్కడే పుట్టి పెరిగిన కాలా ఆ ప్రాంత ప్రజలకు ఎలాంటి కష్టం రాకుండా చూసుకుంటుంటాడు. అయితే ముంబైలో అత్యంత విలువైన ఈ ప్రాంతాన్ని తమ హస్తగతం చేసుకునేందుకు రాజకీయనాయకులు ప్రయత్నాలు చేస్తుంటారు. ముఖ‍్యంగా అధికార పార్టీ నాయకుడు హరిదాదా (నానా పటేకర్‌) ఎలాగైన ధారావీని నుంచి ప్రజలను వెల్లగొట్టి అక్కడ అపార్ట్‌మెంట్లు నిర్మించాలని ప్రయత్నిస్తుంటాడు. కానీ కాలా హరిదాదా పనులకు అడ్డుతగులుతాడు. అలా హరిదాదా, కాలాల మధ్య మొదలైన యుద్ధం ఎలాంటి పరిస్థితులకు దారి తీసింది..? అన్నదే మిగతా కథ.
నటీనటులు : రజనీకాంత్‌ తనదైన స్టైల్స్‌, మేనరిజమ్స్‌తో మరోసారి ఆకట్టుకున్నాడు. నటన పరంగా సూపర్బ్‌ అనిపించిన రజనీ యాక్షన్‌ సీన్స్‌ లో కాస్త ఇబ్బంది పడినట్టుగా అనిపిస్తుంది. రజనీ ఇమేజ్‌ను ఢీ కొట్టే పొలిటీషియన్‌ పాత్రలో నానా పటేకర్‌ నటన సినిమాకు ప్లస్‌ అయ్యింది. రజనీ భార్యగా ఈశ్వరీ రావు నవ్వించే ప్రయత్నం చేసింది. రజనీ, ఈశ్వరీ రావ్‌ల మధ్య వచ్చే సన్నివేశాలు అలరిస్తాయి. కీలక పాత్రలో నటించిన హూమా ఖురేషీ హుందాగా కనిపించింది.
విశ్లేషణ : కబాలి సినిమా తరువాత రజనీ ఇచ్చిన సెకండ్‌ చాన్స్‌ను దర్శకుడు పా.రంజిత్‌ వినియోగించుకోలేకపోయాడు. రజనీ నుంచే అభిమానులు ఆశించే మాస్, కమర్షియల్ అంశాలేవీ లేకుండా సినిమాను రూపొందించిన రంజిత్‌ పూర్తిగా నిరాశపరిచాడు. తొలి భాగం అంతా అసలు కథ ప్రారంభించకుండా ఫ్యామిలీ సీన్స్‌తో లాగించేశాడు. కథలో రజనీ హీరోయిజాన్ని మరింతగా ఎలివేట్ చేసే అవకాశం ఉన్నా దర్శకుడు ఆ దిశగా ప్రయత్నం చేసినట్టుగా కనిపించలేదు. ఇంటర్వెల్‌ సీన్‌తో హైప్‌క్రియేట్‌ చేసినా ద్వితీయార్థంలో అదే టెంపో కంటిన్యూ చేయలేకపోయాడు. మురళీ అందించిన సినిమాటోగ్రఫీ బాగుంది. ధారావి మురికి వాడలను నేచురల్‌గా చూపించాడు.
బోట‌మ్ లైన్ :మ‌రో క‌బాలిలా మారిన కాలా