ఎన్టీఆర్ ను ఇమిటేషన్ చేసిన‌ సత్య.. వ‌రుణ్ తేజ్ ఎమ‌న్నారంటే

టాలీవుడ్ మెగా ప్రిన్స్ వరుణ్‌ తేజ్‌ హీరోగా, టాలెంటెడ్ డైరెక్టర్ మేర్లపాక గాంధీ దర్శకత్వంలో తెరకెక్కిన తాజా చిత్రం ‘కొరియన్‌ కనకరాజు’ (Korean Kanakaraju). ఈ సినిమాలో రితికా నాయక్ హీరోయిన్‌గా నటించగా, కమెడియన్ సత్య కీలక పాత్రలో అదరగొట్టారు. ఈ సినిమా ప్రీమియర్ షోల నుంచే బాక్సాఫీస్ వద్ద పాజిటివ్ టాక్‌తో దూసుకుపోతోంది. ఈ సక్సెస్ నేపథ్యంలో చిత్ర యూనిట్ తాజాగా ఓ విలేకరుల సమావేశాన్ని ఏర్పాటు చేసింది. ఈ ఈవెంట్‌లో వరుణ్‌ తేజ్ మాట్లాడుతూ సినిమా విజయానందం గురించి, అలాగే సోషల్ మీడియాలో జరుగుతున్న కొన్ని వివాదాల గురించి చాలా విషయాలు ఓపెన్‌గా మాట్లాడారు.

ఈ సందర్భంగా వరుణ్‌ తేజ్‌ మాట్లాడుతూ.. ‘‘సినిమాకు మంచి రెస్పాన్స్ వస్తుందని మాకు ముందే నమ్మకం ఉంది. కానీ, థియేటర్లలో ప్రేక్షకులు ప్రతి సీన్‌ను ఇంత బాగా ఎంజాయ్ చేస్తారని ఊహించలేదు. ముఖ్యంగా నాకు బాబు పుట్టిన తర్వాత ఈ హిట్ రావడం చాలా ఆనందంగా ఉంది. నా కొడుకే నా లక్ అనుకుంటున్నాను. ఈ సక్సెస్ చూసి నా భార్య లావణ్య త్రిపాఠి కూడా చాలా చాలా హ్యాపీగా ఫీలవుతోంది. మా బాబాయ్ పవన్ కల్యాణ్‌కు కూడా ఈ సినిమాను త్వరలోనే చూపిస్తాను’’ అని మురిసిపోయారు.

అయితే, ఈ చిత్రంలో కమెడియన్ సత్య చేసిన కొన్ని ఇమిటేషన్ సీన్స్ (Mimicry/Imitation) సోషల్ మీడియాలో కొద్దిగా చర్చనీయాంశంగా మారిన విషయం తెలిసిందే. దీనిపై స్పందిస్తూ వరుణ్‌ తేజ్‌ క్లారిటీ ఇచ్చారు. ‘‘సత్య సినిమాలో పలువురు ప్రముఖ నటులను ఇమిటేట్ చేస్తూ చేసిన సీన్లన్నీ మేం గతేడాది నవంబర్‌లోనే షూట్ చేశాం. ఏదో ట్రోలింగ్ చేద్దామనో, ఎవరినైనా కించపరుద్దామనో ఆ సన్నివేశాలు పెట్టలేదు. ఇమిటేషన్‌కు, ట్రోలింగ్‌కు చాలా తేడా ఉంది. ఎవరైనా ఇమిటేట్ చేయాలంటే గొప్ప గొప్ప నటులనే చేస్తారు తప్ప చిన్నవాళ్లను చేయరుకదా! గతంలో నేను నటించిన ‘ఎఫ్ 3’ సినిమాలో బాబాయ్ ‘వకీల్‌సాబ్’ గెటప్‌ను ఇమిటేట్ చేశా. అలాగే ‘ఎఫ్ 2’లో వెంకీ మామతో కలిసి ఏయన్నార్‌గారిలా డ్యాన్స్ చేశాం. ‘శివాజీ’ సినిమాలో రజనీకాంత్ గారు కూడా చిరంజీవిగారిని ఇమిటేట్ చేశారు కదా!’’ అని వరుణ్ గుర్తుచేశారు.

అలాగే ఎన్టీఆర్ గురిచి మాట్లాడుతూ.. ‘‘ఎన్టీఆర్ గారు టాలీవుడ్‌కు రియల్ హీరో. అసలు హీరో అనే పదానికి అర్థం, నిర్వచనం చెప్పిందే ఆయన. అలాంటి మహానుభావుడిని తక్కువ చేయాలనే ఆలోచన మాకు కలలో కూడా రాదు. కేవలం ప్రేక్షకులను కడుపుబ్బా నవ్వించాలనే ఉద్దేశంతోనే ఆ సీన్స్ పెట్టాం తప్ప, ఎవరి పట్ల అమర్యాదగా ప్రవర్తించాలనే రాత మా ఇంటెన్షన్ కాదు. ఈ సినిమాలో కృష్ణగారు, చిరంజీవిగారిని కూడా సత్య ఇమిటేట్ చేశాడు. కాబట్టి దీన్ని సరదాగా మాత్రమే తీసుకోవాలని అందరినీ కోరుతున్నా’’ అని వరుణ్‌ తేజ్ వివరణ ఇచ్చారు. ఏదేమైనా ‘కొరియన్‌ కనకరాజు’ సినిమాతో వరుణ్ బాక్సాఫీస్ వద్ద మంచి హిట్ కొట్టడంతో పాటు, వివాదాలకు కూడా ఫుల్‌స్టాప్ పెట్టేశారనే చెప్పాలి.