మక్కల్ సెల్వన్ విజయ్ సేతుపతి ప్రధాన పాత్రలో నటించిన బ్లాక్బస్టర్ సినిమా ‘మహారాజ’. నిథిలన్ స్వామినాథన్ దర్శకత్వంలో తెరకెక్కిన ఈ చిత్రం బాక్సాఫీస్ వద్ద భారీ విజయాన్ని సొంతం చేసుకుంది. విజయ్ సేతుపతి కెరీర్లోనే అత్యుత్తమ చిత్రంగా నిలిచి అప్రతిహత విజయం సాధించింది. ఇప్పుడు ఈ సినిమాకు సంబంధించి ఓ సరికొత్త రికార్డు నమోదు కానుంది. ఈ క్రేజీ మూవీ త్వరలోనే హాలీవుడ్లో రీమేక్ కాబోతోంది. ఈ మేరకు ఎన్నో రోజులుగా వస్తున్న వార్తలపై తాజాగా అధికారిక ప్రకటన వెలువడింది.
ప్రముఖ హాలీవుడ్ నిర్మాణ సంస్థ ‘ప్యాషన్ స్టూడియోస్’ ఈ సినిమాను హాలీవుడ్లో రీమేక్ చేయనున్నట్లు అధికారికంగా ప్రకటించింది. దీన్ని ఒక చారిత్రాత్మక మైలురాయిగా ఆ సంస్థ అభివర్ణించింది. హాలీవుడ్లో రీమేక్ కానున్న మొట్టమొదటి తమిళ సినిమాగా ‘మహారాజ’ అరుదైన రికార్డు సృష్టించిందని తెలిపింది. ఈ ప్రకటనతో విజయ్ సేతుపతి అభిమానులు సోషల్ మీడియాలో సంబరాలు చేసుకుంటున్నారు.
ఇదిలా ఉంటే, ఈ హాలీవుడ్ రీమేక్లో విజయ్ సేతుపతి పోషించిన ప్రధాన పాత్రలో ప్రముఖ ఆస్కార్ విన్నర్, హాలీవుడ్ స్టార్ హీరో మాథ్యూ మెక్కోనాగీ నటించనున్నట్లు జోరుగా ప్రచారం జరుగుతోంది. దీనిపై త్వరలోనే చిత్ర యూనిట్ నుంచి అధికారిక ప్రకటన వెలువడే అవకాశం ఉంది. అలాగే ఈ రీమేక్లో నటించే ఇతర నటీనటులు, సాంకేతిక నిపుణుల పూర్తి వివరాలను త్వరలోనే ప్రకటించనున్నారు.
విజయ్ సేతుపతి కెరీర్లో ప్రతిష్టాత్మక 50వ చిత్రంగా ప్రేక్షకుల ముందుకు వచ్చిన ‘మహారాజ’ ఆయనకు నటుడిగా ఎంతో పేరు తెచ్చిపెట్టింది. ఈ సినిమాకు గాను ఆయన పలు ప్రతిష్టాత్మక అవార్డులను కూడా అందుకున్నారు. కేవలం తెలుగు, తమిళ భాషల్లోనే కాకుండా, చైనాలోనూ ఈ సినిమా ఘన విజయం సాధించింది. అక్కడ కూడా భారీ వసూళ్లను రాబట్టి అంతర్జాతీయ స్థాయిలో సంచలనం సృష్టించింది. ఇప్పుడు హాలీవుడ్ రీమేక్తో ఈ చిత్రం మరింత ఉన్నత స్థాయికి వెళ్లడం ఖాయంగా కనిపిస్తోంది.