సూపర్ స్టార్ మహేష్ బాబు కోలీవుడ్ స్టార్ హీరో సూర్య లేటెస్ట్ సినిమా ‘సీన్’పై ప్రశంసలు కురిపించారు. జితు మాధవన్ దర్శకత్వంలో తెరకెక్కిన ఈ చిత్రం ప్రస్తుతం బాక్సాఫీస్ వద్ద అద్భుతమైన కలెక్షన్లతో దూసుకుపోతోంది. ఈ నేపథ్యంలో మహేష్ బాబు సోషల్ మీడియా వేదికగా తన అభిప్రాయాన్ని పంచుకున్నారు.
ఈ సినిమా ఎంతో కూల్‌గా, స్మార్ట్‌గా, ఆద్యంతం ఫన్‌గా సాగుతుందని మహేష్ తెలిపారు. ఈ చిత్రంలో ఇన్‌బరాజ్ పాత్రలో సూర్య నటన అద్భుతంగా ఉందని కొనియాడారు. సూర్య పర్ఫార్మెన్స్ చాలా ఫ్యాబులస్ గా ఉందని ఆయన పేర్కొన్నారు.
అలాగే, ఈ చిత్రంలో కీలక పాత్రలు పోషించిన నజ్రియా, నస్లెన్ నటన కూడా చాలా బాగుందని మహేష్ ప్రశంసించారు. డైరెక్టర్ జితు మాధవన్ పనితనం ప్రతీ విభాగంలోనూ స్పష్టంగా కనిపిస్తోందని చెప్పారు. ఆయన రైటింగ్, ఎగ్జిక్యూషన్ అద్భుతంగా ఉన్నాయని ఆయన కొనియాడారు.
ఈ సినిమా ప్రతి ఒక్కరూ కచ్చితంగా థియేటర్లలో చూడాల్సిన చిత్రమని మహేష్ బాబు పిలుపునిచ్చారు. ప్రస్తుతం మహేష్ బాబు చేసిన ఈ ట్వీట్ సోషల్ మీడియాలో తెగ వైరల్ అవుతోంది. ఈ సినిమా కేవలం మూడు రోజుల్లోనే ప్రపంచవ్యాప్తంగా రూ. 145 కోట్ల గ్రాస్ వసూలు చేసినట్లు ట్రేడ్ వర్గాలు వెల్లడిస్తున్నాయి. ఈ భారీ విజయంతో చిత్ర యూనిట్ సభ్యులు ఎంతో ఆనందం వ్యక్తం చేస్తున్నారు.