భారీ బడ్జెట్‌తో అత్యంత ప్రతిష్టాత్మకంగా తెరకెక్కిన ‘రామాయణ: పార్ట్‌ 1’ సినిమా ఎట్టకేలకు ప్రేక్షకుల ముందుకు వచ్చింది. రణ్బీర్ కపూర్, యశ్, సాయిపల్లవి ప్రధాన పాత్రల్లో నటించిన ఈ చిత్రంపై సర్వత్రా ప్రశంసలు వ్యక్తమవుతున్నాయి. ఈ సినిమాను తెరకెక్కించిన తీరును, విజువల్స్ అద్భుతాన్ని కొనియూడుతూ టాలీవుడ్ దిగ్గజ దర్శకుడు ఎస్‌.ఎస్‌.రాజమౌళి సోషల్ మీడియా వేదికగా స్పందించారు. సినిమా చూసి తాను ఎంతగానో ఆస్వాదించినట్లు ఆయన పేర్కొన్నారు.
సినిమాలోని అత్యున్నత హంగులు, వెండితెరపై ఆవిష్కరించిన అద్భుతమైన దృశ్యాలు కనువిందు చేస్తున్నాయని రాజమౌళి ప్రశంసించారు. రాముడిగా నటించిన రణ్బీర్ కపూర్ నటన అందరినీ ఆకట్టుకుందని చెప్పారు. ముఖ్యంగా వనవాస ఘట్టంలో రణ్బీర్ అభినయం ఎంతో ప్రశాంతంగా కనిపిస్తూనే ప్రేక్షకులను కట్టిపడేసిందని తెలిపారు. మరోవైపు, రావణుడి పాత్రలో రాకింగ్ స్టార్ యశ్ ఆద్యంతం భయపెట్టారని, సీత పాత్రలో సాయిపల్లవి ఎంతో హుందాగా కనిపించారని ఆయన కొనియాడారు.
చిత్రంలోని పతాక సన్నివేశాలు (క్లైమాక్స్) తో పాటు, అంతకుముందు వచ్చే ఘట్టాలు అత్యద్భుతంగా ఉన్నాయని రాజమౌళి వెల్లడించారు. ప్రతి సన్నివేశాన్ని తాను పూర్తిగా ఆస్వాదించినట్లు చెప్పారు. ఇంతటి భారీ విజన్‌ను వెండితెరపై అత్యంత అందంగా ఆవిష్కరించినందుకు నిర్మాత నమిత్ మల్హోత్ర, దర్శకుడు నితేశ్ తివారీతో పాటు చిత్రబృందం మొత్తానికి ఆయన హృదయపూర్వక అభినందనలు తెలిపారు.