కూటమి ప్రభుత్వం ఫీజు రీయింబర్స్‌మెంట్ నిధులు విడుదల చేయకపోవడంపై మాజీ సీఎం వైఎస్ జగన్‌మోహన్‌రెడ్డి తీవ్రంగా స్పందించారు. ఈ నిర్లక్ష్యం వల్లే చిత్తూరులోని ఒక ప్రైవేట్ ఇంజినీరింగ్ కళాశాలలో విద్యార్థిని ఆత్మహత్యాయత్నం చేసిందని ఆయన ఆరోపించారు. ఈ దుస్థితికి ముఖ్యమంత్రి చంద్రబాబు నాయుడు, విద్యాశాఖ మంత్రి నారా లోకేష్ బాధ్యత వహించాలని జగన్ డిమాండ్ చేశారు.
ఫీజుల కోసం విద్యార్థులు రోడ్డెక్కి నిరసన తెలుపుతున్నా ప్రభుత్వం పట్టించుకోవడం లేదని జగన్ విమర్శించారు. సమస్యను పరిష్కరించడానికి బదులు పాలకులు విషయాన్ని పక్కదారి పట్టిస్తున్నారని మండిపడ్డారు. తమ ప్రభుత్వ హయాంలో అమ్మ ఒడి, విద్యా దీవెన, వసతి దీవెన పథకాల ద్వారా పేద విద్యార్థులకు అండగా నిలిచామని ఆయన గుర్తు చేశారు. ప్రస్తుత ప్రభుత్వం ఆ పథకాలను నిర్వీర్యం చేసి పేద పిల్లల భవిష్యత్తుతో ఆడుకుంటోందని ఆరోపించారు.
ఈ విద్యాసంవత్సరం చివరి నాటికి విద్యా దీవెన కింద రూ.9,100 కోట్లు ఇవ్వాల్సి ఉందని జగన్ వివరించారు. అలాగే మూడేళ్లకు సంబంధించి వసతి దీవెన బకాయిలు రూ.3,300 కోట్లు పేరుకుపోయాయని తెలిపారు. మొత్తం రూ.12,400 కోట్లలో ప్రభుత్వం ఇప్పటివరకు కేవలం రూ.2,800 కోట్లు మాత్రమే ఇచ్చిందని చెప్పారు. ఇంకా రూ.9,600 కోట్లకు పైగా బకాయిలు పెండింగ్‌లో ఉన్నాయని ఆయన పేర్కొన్నారు.
ప్రభుత్వం ఫీజులు చెల్లించకపోవడంతో కళాశాలల యాజమాన్యాలు విద్యార్థులపై తీవ్ర ఒత్తిడి తెస్తున్నాయని జగన్ ఆవేదన వ్యక్తం చేశారు. ఫీజు కట్టకపోతే పరీక్షలు రాయనివ్వమని, సర్టిఫికెట్లు ఇవ్వమని వేధిస్తున్నాయని తెలిపారు. ఈ ఒత్తిడి తట్టుకోలేక కొందరు చదువు మానేసి పనులకు వెళ్తుంటే, మరికొందరు ఆత్మహత్యాయత్నాలకు పాల్పడుతున్నారని అన్నారు.
విద్యాశాఖను భ్రష్టుపట్టించిన నారా లోకేష్‌ను వెంటనే మంత్రి పదవి నుంచి తప్పించాలని వైఎస్ జగన్ డిమాండ్ చేశారు. విద్యార్థులపై కళాశాలల ఒత్తిడిని తక్షణమే ఆపాలని కోరారు. పెండింగ్‌లో ఉన్న విద్యా దీవెన, వసతి దీవెన బకాయిలను వెంటనే విడుదల చేసి పేద విద్యార్థులకు భరోసా కల్పించాలని ఆయన ప్రభుత్వాన్ని కోరారు.