భారతరత్న అవార్డు గ్ర‌హీత, మాజీ ప్రధాని అటల్‌ బిహారీ వాజ్‌పేయికి నివాళులర్పించేందుకు విదేశీ ప్ర‌ముఖ నేతలు తరలి వస్తున్నారు. బూటాన్‌ రాజు జిగ్మే ఖేసర్‌ నంగ్యేల్‌ వాంగ్‌చుక్‌ ఢిల్లీకి చేరుకుని వాజ్‌పేయి భౌతికకాయానికి నివాళులర్పించారు. నేపాల్‌ విదేశాంగ మంత్రి ప్రదీప్ కుమార్, గ్యావల్, శ్రీలంక విదేశాంగ మంత్రి లక్ష్మణ్ కిరిల్లా, బంగ్లాదేశ్ విదేశాంగ మంత్రి అబ్దుల్ హసన్‌ మహ్మద్‌ అలీ, పాకిస్థాన్‌ న్యాయశాఖ మంత్రి అలీ జఫర్‌ సైతం ఢిల్లీ చేరుకున్నారు. వాజ్‌పేయి పార్థివదేహాన్ని సందర్శించి నివాళులర్పించారు. వీరంద‌రూ వాజ్‌పేయి అంత్య‌క్రియ‌ల్లో పాల్గొన‌నున్నారు.
వాజ్‌పేయి భౌతికకాయాన్ని ఆయన నివాసం నుంచి దీన్‌దయాళ్ ఉపాధ్యాయ్ మార్గ్‌లోని బీజేపీ జాతీయ కార్యాలయానికి తరలించారు. అక్కడి నుంచి మధ్యాహ్నం 1 గంటకు అంతిమ యాత్ర ప్రారంభం కానుంది. సాయంత్రం యమునా నది ఒడ్డున స్మృతి స్థల్‌లో అధికార లాంఛనాలతో వాజ్‌పేయి అంత్యక్రియలు జ‌ర‌గ‌నున్నాయి.
బంగ్లా విముక్తి పోరాటంలో తమ ప్రజలకు మద్దతుగా నిలిచిన విషయం మర్చిపోలేనిదని, బెంగాలీ సంగీతంతో ఆయనకున్న అనుబంధం మరువలేనిదని బంగ్లా ప్రధాని షేక్ హ‌షీనా కొనియాడారు.
మాజీ ప్రధాని వాజ్‌పేయి మృతి ఎంతో భాధాకరం.. ఆయన మరణానికి సంతాపంగా భారత్‌తోపాటు తమ జాతీయ జెండాను అన్ని ప్రభుత్వ కార్యాలయాల్లో అవనతం చేసి, వాజ్‌పేయి పట్ల తమ గౌరవాన్ని చాటుకుంటామని మారిషస్ ప్రధాని ప్రవీద్ కుమార్ జగన్నాష్ తన సంతాప సందేశంలో పేర్కొన్నారు.
‘భారత మాజీ ప్రధాని అటల్‌ బిహారీ వాజ్‌పేయి మృతి విచారకరం. ఆయన గొప్ప నాయకుడే కాదు.. సాహిత్యం, కళల్లో మంచి నిష్ణాతుడు. ప్రధానిగా మాల్దీవుల్లో పర్యటించారు. ఓ గొప్ప నేతను కోల్పోయిన భారత్‌కు మాల్దీవులు ప్రభుత్వం తరఫున ప్రగాఢ సానుభూతి తెలియజేస్తున్నామని మాల్దీవులు అధ్యక్షుడు అబ్దుల్లా యమీన్‌ అబ్దుల్ గయూమ్‌ తన సందేశంలో పేర్కొన్నారు.
భారత గొప్ప నేతల్లో వాజ్‌పేయి ఒకరు. ఆయన మృతి విచారకరం. బ్రిటన్ ప్రభుత్వానికి ఆయన మంచి సన్నిహితుడని యూకే మంత్రి మార్క్‌ ఫీల్డ్‌ ప్రశంసించారు.
‘వాజ్‌పేయి ప్రపంచం గర్వించదగ్గ నేత… గొప్ప రాజనీతిజ్ఞుడు. భారత్‌, రష్యా మధ్య వ్యూహాత్మక భాగస్వామ్యాన్ని బలపర్చేందుకు ఆయన ఎంతగానో కృషి చేశారు… ఆయన మృతిపట్ల సానుభూతి ప్రకటిస్తున్నాం’ రష్యా అధ్యక్షుడు వ్లాదిమర్‌ పుతిన్‌