మహిళల్లో థైరాయిడ్ గ్రంధి పనితీరులో వచ్చే అతి చిన్న మార్పు కూడా వారి సంతానోత్పత్తి సామర్థ్యాన్ని, నెలసరి క్రమాన్ని, గర్భధారణ ఆరోగ్యాన్ని తీవ్రంగా దెబ్బతీస్తుందని వైద్య నిపుణులు హెచ్చరిస్తున్నారు. తరచుగా ఎదురయ్యే అలసట, బరువు పెరగడం, క్రమం లేని నెలసరి వంటి లక్షణాలను చాలామంది సాధారణ సమస్యలుగా భావించి నిర్లక్ష్యం చేస్తుంటారు. అయితే పిల్లలు కలగడంలో ఇబ్బందులు ఎదురైనప్పుడు మాత్రమే అసలు కారణం థైరాయిడ్ అని తెలుసుకుని ఆందోళన చెందుతుంటారు. థైరాయిడ్ సమస్యలు గుర్తించడానికంటే ముందే అవి కొన్ని నెలలు లేదా సంవత్సరాల పాటు మహిళల ప్రత్యుత్పత్తి వ్యవస్థను లోలోపలే బలహీనపరుస్తాయని వైద్యులు స్పష్టం చేస్తున్నారు.
ప్రస్తుత కాలంలో యువతుల్లో థైరాయిడ్ సమస్యలు ఎక్కువగా కనిపిస్తున్నాయి. అధిక మానసిక ఒత్తిడి, జీవనశైలి లోపాలు, నిద్రలేమి, పోషకాహార లోపం వంటి కారణాల వల్ల చిన్న వయసులోనే ఈ హార్మోన్ల అసమతుల్యత బారిన పడుతున్నారు. చాలామంది మహిళలు తమకు సంతానలేమి సమస్యలు ఎదురయ్యే వరకు థైరాయిడ్ లోపాన్ని గుర్తించలేకపోతున్నారని ఆమె వివరించారు.
శరీరంలో మెటబాలిజం, శక్తి స్థాయిలు, ఇతర ముఖ్యమైన విధులను నియంత్రించే హార్మోన్లను థైరాయిడ్ గ్రంధి ఉత్పత్తి చేస్తుంది. ఈ హార్మోన్లకు మహిళల ప్రత్యుత్పత్తి వ్యవస్థతో అత్యంత దగ్గరి సంబంధం ఉంది. గర్భం దాల్చడంలో ఇబ్బందులు, పదే పదే గర్భస్రావం కావడం, అకస్మాత్తుగా బరువులో మార్పులు రావడం వంటి సమస్యలతో వచ్చే రోగులను పరీక్షించినప్పుడు వారిలో థైరాయిడ్ లోపాలు ప్రధాన కారణంగా బయటపడుతున్నాయని డాక్టర్ రిచికా పేర్కొన్నారు.
మహిళల్లో అండాల విడుదల సక్రమంగా జరగడానికి, నెలసరి నియంత్రణకు, ఆరోగ్యకరమైన గర్భధారణకు థైరాయిడ్ హార్మోన్లు ఎంతో అవసరం. ఈ గ్రంధి పనితీరు మరీ మందగించినా (హైపోథైరాయిడిజం) లేదా మరీ ఎక్కువైనా (హైపర్థైరాయిడిజం) శరీరంలోని ఇతర ప్రత్యుత్పత్తి హార్మోన్ల సమతుల్యత దెబ్బతింటుంది. ఇది అండాల విడుదల చక్రాన్ని మార్చడమే కాకుండా గర్భధారణను ఆలస్యం చేస్తుంది. ఒకవేళ గర్భం దాల్చినప్పటికీ సరైన చికిత్స తీసుకోకపోతే కాంప్లికేషన్స్ పెరిగే ప్రమాదం ఉంది.
థైరాయిడ్ లక్షణాలు మొదట్లో చాలా సాధారణంగా అనిపించడం వల్ల చాలామంది వీటిని ఒత్తిడి లేదా అలసటగా భావిస్తుంటారు. నిరంతర అలసట, విపరీతంగా జుట్టు రాలడం, అకస్మాత్తుగా బరువు పెరగడం, మూడ్ స్వింగ్స్, నెలసరి ఆలస్యం కావడం వంటి సంకేతాలను శరీరం ముందుగానే ఇస్తుందని వైద్యులు చెబుతున్నారు. వీటితో పాటు చలిని తట్టుకోలేకపోవడం, ఆందోళన, నిద్రలేమి, చర్మం పొడిబారడం, ఆకలిలో మార్పులు వంటి లక్షణాలు ఉంటే తక్షణమే స్పందించాలి.
ఇరవై, ముప్పై ఏళ్ల వయసున్న యువతుల్లో ఈ సమస్యలు పెరగడానికి మారుతున్న జీవనశైలి విధానాలే ప్రధాన కారణం. అయితే ఈ వ్యాధిని ముందుగా గుర్తిస్తే సులభంగా నయం చేయవచ్చని వైద్యులు భరోసా ఇస్తున్నారు. సకాలంలో సరైన చికిత్స తీసుకోవడం ద్వారా మహిళలు సహజ పద్ధతిలో లేదా ఫెర్టిలిటీ చికిత్సల సహాయంతో విజయవంతంగా గర్భం దాల్చవచ్చు. నెలసరి సమస్యలు లేదా సంతానలేమి ఇబ్బందులు ఉన్న మహిళలు క్రమంతప్పకుండా థైరాయిడ్ స్క్రీనింగ్ పరీక్షలు చేయించుకోవడం ద్వారా భవిష్యత్తులో వచ్చే పెద్ద ప్రమాదాల నుంచి తప్పించుకోవచ్చు.
గమనిక: అందించిన ఈ సమాచారం కేవలం అవగాహన కోసం మాత్రమే. దీనిని నిపుణులైన వైద్యుల సలహాగా భావించకూడదు. ఏవైనా సందేహాలు ఉంటే ఖచ్చితంగా మీ వ్యక్తిగత వైద్యులను సంప్రదించాల్సి ఉంటుంది.