బాల్ ట్యాంపరింగ్ వివాదంలో చిక్కుకుని ఏడాది నిషేధాన్ని అనుభవించనున్న ఆస్ట్రేలియా క్రికెట్ జట్టు వైస్ కెప్టెన్ డేవిడ్ వార్నర్ మొద‌టిసారి నోరు విప్పారు. ట్యాంపరింగ్‌కు సహకరించి గేమ్‌కు మాయని మచ్చ తెచ్చిన విషయాన్ని అంగీకరించిన వార్నర్.. ఇందులో తన భాగస్వామ్యం ఉన్నందుకు క్షమాపణలు చెప్పాడు.
ట్యాంపరింగ్ కుంభకోణంలో తెలిసో, తెలియకో తన పాత్ర కూడా ఉందని, అందుకు మన్నించమని కోరడానికి సిగ్గు పడటం లేదని చెప్పాడు. ఈ మేరకు తన ట్విట్టర్ ఖాతాలో ఓ పోస్టు పెడుతూ, “అందరు ఆస్ట్రేలియా క్రికెట్ ఫ్యాన్స్ కు మరియు ప్రపంచానికి… ప్రస్తుతం నేను సిడ్నీకి తిరిగి వెళుతున్నాను. నేను చేసిన తప్పులు క్రికెట్ ను డ్యామేజ్ చేశాయి. నా తరఫున తప్పున్నందుకు బాధ్యత వహిస్తూ క్షమాపణలు కోరుతున్నానంటూ వార్నర్ తొలిసారి పెదవి విప్పాడు.
నేను బాలుడిగా ఉన్నప్పటి నుంచి ఆటను ఎంతో ప్రేమిస్తున్నాను. ఇప్పుడిక నా కుటుంబంతో, స్నేహితులతో నమ్మకమైన సలహాదారులతో సమయం గడపుతాను. మరికొన్ని రోజుల్లో మళ్లీ కలుస్తాను”. కాగా, వార్నర్ ను ఐపీఎల్ హైదరాబాద్ ఫ్రాంచైజీ సన్ రైజర్స్ హైదరాబాద్ సైతం తప్పించిన సంగతి తెలిసిందే.