మా ( మూవీ ఆర్టిస్ట్స్ అసోసియేషన్) ఎన్నికల వేడి అప్పుడే మొదలయ్యింది. ఈ సారి ఎన్నికల్లో మంచు కుటుంబం పోటీచేయబోతున్నట్టు వార్తలు వస్తున్నాయి. మరోవైపు ప్రకాశ్రాజ్ సైతం ఈ ఎన్నికల్లో పోటీచేస్తున్నారు. దీంతో ఎవరికి వారు మద్దతు కూడగట్టుకొనేందుకు అప్పుడే ప్రయత్నాలు మొదలుపెట్టారు. ఇటీవల కలెక్షన్కింగ్, మంచు మోహన్బాబు, ఆయన కుమారుడు విష్ణు.. సూపర్ స్టార్ కృష్ణను కలుసుకున్నారు. మా ఎన్నికల నేపథ్యంలో వీరి భేటీ ప్రాధాన్యం సంతరించుకున్నది. మరోవైపు ప్రకాశ్ రాజ్ సైతం మద్దతు కూడ గట్టుకొనేందుకు యత్నిస్తున్నారు. ఆయనకు మెగాస్టార్ చిరంజీవి మద్దతు ఇస్తున్నట్టు వార్తలు వస్తున్నాయి.
గతంలో ఓ సారి ప్రకాశ్రాజ్.. జనసేన అధినేత పవన్కల్యాణ్పై విమర్శలు గుప్పించారు. ఈ క్రమంలో ఆయనకు ప్రస్తుతం చిరంజీవి మద్దతు ఇస్తున్నట్టు వార్తలు రావడం గమనార్హం. మా ఎన్నికలు అంటేనే రసవత్తరంగా సాగుతూ ఉంటాయి. ప్రస్తుతం ప్రకాశ్రాజ్కు మెగా ఫ్యామిలీ మద్దతు ఇస్తుండగా.. ఇటు మంచు కుటుంబానికి నరేశ్ అండగా నిలబడుతున్నట్టు సమాచారం. ప్రస్తుత అధ్యక్షుడిగా ఉన్న నరేశ్ .. లాక్డౌన్ సమయంలో ఎంతోమందిని ఆదుకున్నారు. చిన్న నటులు, సినీ ఇండస్ట్రీ కి చెందిన వారితో ఆయనకు సత్సంబంధాలు ఉన్నాయి.
అయితే గతంలో మెగా కుటుంబం నరేశ్కు మద్దతు ఇచ్చింది. కానీ ఈ సారి మాత్రం ప్రకాశ్ రాజ్కు సపోర్ట్ చేస్తున్నట్లు టాక్. అయితే ప్రకాశ్రాజ్ పరభాషా నటుడు అయినప్పటికీ ఆయనకు మెగా ఫ్యామిలీ అండగా ఉంది కాబట్టి.. సీన్ మరోలా ఉంటుందని అంటున్నారు. ప్రకాశ్ రాజ్ను అంతా మెగా మద్దతుదారుడిగా మాత్రమే చూస్తారని కూడా టాక్ నడుస్తోంది. ఏది ఏమైనా ప్రస్తుతం మా ఎన్నికలతో హీట్ పెరిగింది.