హార్డ్ హిట్టింగ్ సినిమాలతో గుర్తింపు పొందిన దర్శకుడు అజయ్ భూపతి ప్రస్తుతం తన కొత్త చిత్రం ‘శ్రీనివాస మంగాపురం’ను తెరకెక్కిస్తున్నారు. ఈ చిత్రం ద్వారా సూపర్ స్టార్ కృష్ణ మనవడు, మహేష్ బాబు మేనల్లుడు అయిన జయకృష్ణ ఘట్టమనేని హీరోగా పరిచయం అవుతున్నారు. ఆయనకు జోడిగా బాలీవుడ్ నటి రవీనా టాండన్ కుమార్తె రాశా థడాని నటిస్తోంది. ‘ఉయి అమ్మా’ పాటతో దేశవ్యాప్తంగా గుర్తింపు పొందిన ఆమె ఈ సినిమాతో తెలుగు తెరకు ఎంట్రీ ఇస్తోంది.
ప్రముఖ నిర్మాత అశ్వినీ దత్ ఈ చిత్రాన్ని సమర్పిస్తుండగా, పి కిరణ్ నిర్మాణ బాధ్యతలు నిర్వహిస్తున్నారు. ఇప్పటికే విడుదలైన హీరో–హీరోయిన్ల ఫస్ట్ లుక్ పోస్టర్లు సినిమాపై మంచి ఆసక్తిని రేకెత్తించాయి. ఈ గ్రామీణ నేపథ్యంలో సాగే కథలో లెజెండరీ నటుడు మోహన్ బాబు కీలక పాత్ర పోషిస్తున్నారని ముందే వెల్లడైంది. రాశా థడాని తండ్రి పాత్రలో ఆయన కనిపించనున్నారు.
తాజాగా విడుదలైన మోహన్ బాబు ఫస్ట్ లుక్ పోస్టర్ అభిమానులను ఆకట్టుకుంటోంది. వెంకటప్పయ్య నాయుడు పాత్రలో ఆయన భీకరమైన వ్యక్తిత్వంతో కనిపిస్తున్నారు. సాల్ట్ అండ్ పెప్పర్ హెయిర్ స్టైల్, దట్టమైన మీసాలు ఆయన పాత్రకు మరింత గంభీరతను తెచ్చాయి. తెల్లటి కుర్తా–ధోతి దుస్తుల్లో గ్రామ పెద్దగా ఆయనకు ప్రత్యేకమైన ఆరా కనిపిస్తోంది. ఆయన ముఖంలో కనిపించే కఠినత్వం, లోపల దాగిన ఆగ్రహాన్ని సూచించే భావాలు పాత్ర తీవ్రతను తెలియజేస్తున్నాయి.