బెంగళూరులో సోషల్ మీడియా రీల్స్ పిచ్చి ఎంత ప్రమాదకరంగా మారుతుందో చూపించే విచిత్ర ఘటన వెలుగులోకి వచ్చింది. కర్ణాటకలోని బెంగళూరు నగరంలోని వ్యాలీకావల్ పోలీస్ స్టేషన్ పరిధిలో ఈ ఘటన జరిగింది.
ఒకే కుటుంబానికి చెందిన ఐదుగురు వ్యక్తులు—భార్యాభర్తలు, అత్త, బావమరిది—ఒక పెద్ద సంచిని పార్శిల్గా పంపేందుకు కొరియర్ సెంటర్కు తీసుకువచ్చారు. మొదట్లో ఇది సాధారణ పార్శిల్లాగానే కనిపించినా, లోపల నుంచి కదలికలు రావడం గమనించిన సిబ్బంది అనుమానించారు. వెంటనే సంచిని తెరవాలని కోరగా, అందులోనుంచి ఒక వృద్ధుడు బయటకు రావడం అందరినీ షాక్కు గురిచేసింది.
సంచిలో గాలి సరిగా లేకపోవడంతో ఆ వృద్ధుడు తీవ్ర అస్వస్థతకు గురయ్యాడు. ఊపిరి పీల్చుకోవడంలో ఇబ్బందులు పడుతూ బయటకు వచ్చిన అతనిని చూసి అక్కడున్న వారు భయాందోళనకు గురయ్యారు. వెంటనే పరిస్థితిని అదుపులోకి తీసుకుని అతనికి సహాయం చేశారు.
ఈ ఘటన వెనుక అసలు కారణం మరింత ఆశ్చర్యానికి గురిచేసింది. ఉగాది, రంజాన్ పండుగల నేపథ్యంలో బస్సు టికెట్లు దొరకకపోవడంతో, “వృద్ధుడిని కొరియర్ ద్వారా పంపిస్తే ఎలా ఉంటుంది?” అనే ఫన్నీ కాన్సెప్ట్తో సోషల్ మీడియాలో రీల్ చేయాలని ఈ కుటుంబం ప్లాన్ చేసినట్లు తెలిసింది.
అంతేకాకుండా, తమ పార్శిల్ను తప్పనిసరిగా పంపించాలంటూ కొరియర్ సిబ్బందితో వాదనకు దిగడం కూడా గమనార్హం. ఈ ఘటన సోషల్ మీడియా కోసం ప్రజలు ఎంతవరకు వెళ్తున్నారో చూపిస్తోంది. నిపుణులు చెబుతున్నదేమిటంటే, లైక్స్, వ్యూస్ కోసం ప్రాణాలను ప్రమాదంలో పెట్టే ఇలాంటి చర్యలు తీవ్రమైన పరిణామాలకు దారి తీసే అవకాశం ఉందని హెచ్చరిస్తున్నారు.