ప్రస్తుతం సుకుమార్ దర్శకత్వంలో రూపొందుతున్న సినిమా షూటింగ్ లో బిజీగా ఉన్న రామ్ చరణ్ తేజ ఇదే సమయంలో అక్కడ కొన్ని ఆసక్తికరమైన వ్యాఖ్యలు చేసినట్టుగా వార్తలు వస్తున్నాయి. గోదావరి జిల్లాల్లో ప్రస్తుతం ఈ సినిమా షూటింగ్ జరుగుతోంది. ఈ నేఫథ్యంలో చరణ్ మీడియాతో మాట్లాడుతూ.. తన తండ్రి తదుపరి సినిమా గురించి ఒక ప్రకటన చేశాడు.
చిరంజీవి 151 వ సినిమా ఆగస్టులో ప్రారంభం అవుతుందని చరణ్ చెప్పాడు. ఆ సినిమాలో మెగాస్టార్ ఒక గొప్ప పాత్రలో కనిపించబోతున్నాడని చరణ్ అభిమానులకు తెలియజేశాడు. ఉయ్యాలవాడ నరసింహా రెడ్డి జీవిత కథ ఆధారంగా చిరు తదుపరి సినిమా ఉండబోతోందనేది తెలిసిన విషయమే. ఇదే సమయంలో చరణ్ బాబాయ్ పవన్ కల్యాణ్ గురించి మరింత ఆసక్తికరమైన వ్యాఖ్యలు చేశాడు. బాబాయ్ సినిమాలతో బిజీగా ఉన్నాడు అంటూనే.. అభిమానులకు ఒక ఆసక్తికరమైన పిలుపునిచ్చాడు.
‘బాబాయ్ ఏ కార్యక్రమం చేపట్టినా.. అభిమానులు అంతా ఆయన వెన్నంటే ఉండాలి..’ అని చరణ్ అన్నాడు. మరి పవన్ కల్యాణ్ ప్రస్తుతం జనసేన పార్టీతో రాజకీయం చేస్తున్న సంగతి తెలిసిందే. ఈ నేఫథ్యంలో చరణ్.. ‘బాబాయ్ ఏ కార్యక్రమం చేపట్టినా. .వెన్నంటే ఉండాలి..’ అనే మాటతో.. రాజకీయంగా పవన్ కు మద్దతు పలికినట్టే అనుకోవాల్సి వస్తోంది. ప్రస్తుతం చిరంజీవి కాంగ్రెస్ పార్టీ తరపున రాజ్యసభ సభ్యుడిగా ఉన్న సంగతి తెలిసిందే. చరణ్ మద్దతు మాత్రం పవన్ వైపు ఉన్నట్టుంది.
Related