హైదరాబాద్ శివారులోని బోడుప్పల్‌లో 54 రోజులుగా తన పాపను ఒడిలో పెట్టుకుని నిరసన దీక్ష చేస్తోన్న సంగీత ఎట్టకేలకు ఈ రోజు తన అత్తింట్లో తిరిగి అడుగుపెట్టింది. టీఆర్ఎస్ మాజీ నేత శ్రీనివాస్ రెడ్డి తన భార్య సంగీతను కొట్టిన దృశ్యాలు 54 రోజుల క్రితం మీడియాలో సంచలనం కలిగించిన విషయం తెలిసిందే. అప్ప‌టినుంచి సంగీత దీక్ష చేస్తున్న సంగ‌తి తెలిసిందే.
హైదరాబాద్‌లోని మియాపూర్‌ ఫ్యామిలీ కోర్టు ఈ రోజు సంగీత కేసులో పలు ఆదేశాలు జారీ చేసింది. సంగీతను ఆమె భర్త శ్రీనివాస్ రెడ్డి గౌరవ ప్రదంగా ఇంటికి తీసుకెళ్లాలని చెప్పింది. అంతేకాకుండా ప్రతి నెల రూ.20వేలు చెల్లించాలని ఆదేశాలు జారీ చేసింది.
అయితే, శ్రీనివాస రెడ్డి మాత్రం కోర్టులో కౌంటర్ పిటిషన్ దాఖలు చేస్తానని అంటున్నారు. కోర్టు తీర్పుతో ఈ రోజు పలువురు అధికారులు సంగీత ఇంటికెళ్లి ఆమెను ఇంట్లోకి పంపారు. ఇంటికి తాళాలు వేసి ఉండడంతో ఆ తాళాలను సుత్తి సాయంతో సంగీత స్వయంగా పగులకొట్టింది. ఆ సమయంలో శ్రీనివాస రెడ్డి ఓ టీవీ చానెల్ లైవ్‌లో మాట్లాడుతూ ఈ దృశ్యాలను చూశారు.