ఏదైనా పరీక్షలు రాయడానికి విద్యా సంస్థలు హాట్ టికెట్లు అందిస్తాయి. అందులో ఒకటికి రెండుసార్లు పేర్లు, పరీక్ష, పరీక్ష కేంద్రం తదితర వివరాలు చూసుకోవాలని చెబుతారు. ఆ అన్నీ కరెక్టే ఉంటాయని భావిస్తారు. ఆ నిర్లక్ష్యమే కొంపముంచేటట్టు ఉంది. ఇప్పుడు అలాంటిదే ఓ విద్యార్థిని కొంపముంచింది.
హాల్ టికిట్పై తన ఫొటో కాకుండా ఓ మహిళ అర్ధనగ్నంగా ఉన్న ఫోటో వచ్చింది. ఈ ఘటన బీహర్లోని లలిత్ నారాయణ్ మిథిలా విశ్వవిద్యాలయ పరిధిలో చోటు చేసుకుంది. పాట్నాలోని మధుబాని ఎస్ఎంజే కళాశాలలో ఓ విద్యార్థిని సైన్స్ గ్రూపు (ఫైనలియర్) చదువుతోంది. మిథిలా యూనివర్సిటీ పరిధిలో మంగళవారం (ఏప్రిల్-10) నుంచి పరీక్షలు ప్రారంభమయ్యాయి.
పరీక్షలు రాసేందుకు యూనివర్సిటీ వెబ్సైట్ నుంచి తన హాల్టికెట్ను డౌన్లోడ్ చేసుకుంది. హాల్ టికెట్లో తన ఫొటోకి బదులుగా బికినీ ధరించి ఉన్న ఓ మహిళ ఫొటో ప్రింటయ్యింది . దీంతో షాక్కు గురైన ఆ విద్యార్థిని ఈ విషయాన్ని విశ్వవిద్యాలయ అధికారుల దృష్టికి తీసుకెళ్లింది. అప్లై చేసుకున్నప్పుడు తన ఫొటోనే అప్లోడ్ చేయగా ఇప్పుడు ఆ ఫొటో ఎలా వచ్చిందో తెలియదని చెప్పింది.
యూనివర్సిటీ ఎగ్జామినేషన్ కంట్రోలర్ కుల్ నంద్ యాదవ్ ఈ వ్యవహారంపై స్పందించారు. బాధిత విద్యార్థినికి కొత్త హాల్ టికెట్ను ఇవ్వాలని అధికారులను ఆదేశించారు. ఈ ఘటనకు కారణమైన వారిపై చర్యలు తీసుకుంటామని చెప్పారు.
2017 అక్టోబర్లోనూ ఇలాంటి ఘటనే చోటుచేసుకుంది. ఫస్టియర్ బీకామ్ విద్యార్థి ఫోటోకు బదులుగా హాల్ టికెట్లో వినాయకుడి బొమ్మను ముద్రించారు. ఆన్లైన్లో జరిగే తప్పిదాల వల్లే ఇలాంటి ఘటనలు పునరావృతమవుతున్నాయని విద్యార్థులు వాపోతున్నారు.