బంగాల్కు చెందిన ముగ్గురు ఐపీఎస్ అధికారుల డిప్యుటేషన్ అంశంపై కేంద్రానికి, మమతా బెనర్జీ ప్రభుత్వానికి మధ్య వివాదం అంతకంతకూ తీవ్రమవుతోంది. ముగ్గురు అధికారులను తక్షణమే పంపాలని కేంద్ర హోంమంత్రిత్వ శాఖ మరోసారి ఆదేశాలు పంపింది. ఈ విషయంపై మమతా మండిపడ్డారు. రాష్ట్రప్రభుత్వం అనుమతి లేకుండా ఐపీఎస్ అధికారులను కేంద్రానికి పంపాలనడం అధికార దుర్వినియోగమనేని, ఇది ఐపీఎస్ కేడర్ అత్యవసర నిబంధన-1954ను వక్రీకరించడమేనని ధ్వజమెత్తారు.
విస్తరణవాదులకు, అప్రజాస్వామిక శక్తులకు తలవంచే ప్రసక్తే లేదని కేంద్రంపై ఘాటు విమర్శలు చేశారు మమత. మరోవైపు కేంద్రం మాత్రం ముగ్గురు ఐపీఎస్ అధికారులకు ప్రభుత్వం బాధ్యతలు కూడా అప్పగించిందని, వీలైనంత త్వరగా వారిని పంపాలని బంగాల్ ప్రభుత్వానికి స్పష్టం చేసింది.
బిజేపి జాతీయ అధ్యక్షుడు జేపీ నడ్డా బంగాల్లో గతవారం పర్యటించినప్పుడు ఆయన కాన్వాయ్పై రాళ్లదాడి జరిగింది. ఇందుకు భద్రతా ఏర్పాట్ల వైఫల్యమే కారణమని కేంద్రం భావించింది. నడ్డా పర్యటనకు భద్రతా ఏర్పాట్లు సమీక్షించిన ముగ్గురు ఐపీఎస్ అధికారులు కేంద్రానికి రావాలని గతవారమే మొదటిసారి ఆదేశించింది. ఇప్పుడు మరోసారి ఉత్తర్వులు పంపింది.