క్రికెట్‌ను బాల్ ట్యాంపరింగ్ వివాదం కుదిపేస్తోంది. అస్ట్రేలియా కెప్టెన్, వైస్ కెప్టెన్ ఇద్ద‌ర్నీ వారి ప‌ద‌వుల‌నుంచి తొల‌గించిన సంగ‌తి తెలిసిందే. అయితే ఈ వివాదం ఎలా బయటకు వ‌చ్చింద‌నేది ఇప్పుడు ఆసక్తికరంగా మారింది.
సౌతాఫ్రికాతో జరిగిన మూడో టెస్టులో బాల్ ట్యాంపరింగ్ వ్యవహారం వెలుగులోకి వచ్చింది. బాన్‌క్రాఫ్ట్ బంతిని గరుకుగా ఉండే టేప్‌తో రుద్దుతూ రెడ్ హ్యాండెడ్‌గా కెమెరాకు చిక్కాడు.
ఇదేమి అనుకోకుండా కెమెరాకు చిక్కలేదు. ఆసీస్ ఆటగాళ్లను కెమెరా కళ్లు అనుమానంతో వెంటాడాయి. తమ పిచ్‌ల మీద బంతి రివర్స్ స్వింగ్ కావడం ఏంటబ్బా? అని ఓ మాజీ ఆటగాడికి అనుమానం రావడంతోనే ఆసీస్ బాగోతం బయటకు వచ్చింది. ట్యాంపరింగ్ గురించి ఫానీ డివిలియర్స్ అనే సౌతాఫ్రికా మాజీ బౌలర్‌కి అనుమానం వచ్చింది.
ప్రస్తుతం కామెంటేటర్‌గా పని చేస్తోన్న ఆయనకు సఫారీ పిచ్‌ల గురించి పూర్తి అవగాహన ఉంది. ఉపఖండంలోని పిచ్‌ల్లా సఫారీ పిచ్‌లు రివర్స్ స్వింగ్‌కు అనుకూలించవు. మన దగ్గర పిచ్ మీద విపరీతంగా పగుళ్లు ఉంటాయి. కాబట్టి బంతి రివర్స్ స్వింగ్ అవుతుంది. కానీ సౌతాఫ్రికా పిచ్‌లు పచ్చికతో ఉంటాయి. కాబట్టి ఆ ఛాన్స్ లేదు. 40-50 ఓవర్లలోపు అయితే అస్సలు అవకాశం లేదు. బంతి బాగా పాతబడితేనే చాలా అరుదుగా కొద్ది మేర రివర్స్ స్వింగ్‌కు అనుకూలిస్తుంది.
కానీ ఈ సిరీస్‌లో ఆస్ట్రేలియా బౌలర్లు మాత్రం బంతిని రివర్స్ స్వింగ్ చేస్తున్నారు. అది కూడా 30 ఓవర్లలోపే. దీంతో ఫానీ డివిలియర్స్‌కు అనుమానం వచ్చింది. ఆస్ట్రేలియన్లు ఏదో చేస్తున్నారని, అదేంటో తేల్చాలనుకున్నాడు. 26వ ఓవర్ నుంచే బంతి రివర్స్ స్వింగ్ కావడం ఆయన అనుమానం బలపడింది. బంతి ఒకవైపు మాత్రమే తడిగా, బరువుగా ఉంటేనే అలా చేయడం సాధ్యమని ఆయనకు తెలుసు. స్టీల్ గేట్ లాంటి దాని మీద రుద్దితే బంతి వెంటనే అనూహ్యంగా రివర్స్ స్వింగ్ అవుతుందని ఓ బౌలర్‌గా ఆయనకు అనుభవం ఉంది.
దీంతో అదే విషయం బ్రాడ్‌కాస్టర్లకు చెప్పాడు. కెమెరాల ద్వారా ఆసీస్ ఫీల్డర్లపై నిఘా ఉంచేలా ఒప్పించాడు. కెమెరా సిబ్బందితో మాట్లాడి.. బంతి రివర్స్ స్వింగ్ అవుతోంది.. ఏదో తేడాగా ఉంది.. ఫీల్డర్లపై ఓ కన్నేసి ఉంచమన్నాడు. మ్యాచ్ మధ్యలోనూ ఈ నిఘా ఆగలేదు. అలా బంతి ఎక్కడుంటే కెమెరా కన్ను అక్కడ ఉండేలా జాగ్రత్తపడ్డారు. చివరకు బంతిని టేప్‌తో రుద్దుతూ బాన్‌క్రాఫ్ట్ దొరికిపోయాడు. తర్వాత పదే పదే టీవీ స్క్రీన్లలో ప్రసారం చేశారు. తర్వాత కోచ్ లీమన్ మరో ప్లేయర్‌తో వాకీ టాకీలో వాటర్ బాటిల్ తీసుకెళ్లమనడం కూడా ఒడుపుగా రికార్డ్ చేశారు. అలా ట్యాంపరింగ్ వ్యవహారం వెలుగులోకి వచ్చింది.