కరోనా వ్యాక్సిన్ తీసుకుంటే స్త్రీ, పురుషుల్లో సంతాన ఉత్పత్తి సామర్థ్యం తగ్గిపోతుందని.. పురుషుల వీర్య కణాల మీద వ్యాక్సిన్ ప్రభావం చూపిస్తుందని ఓ దుష్ర్పచారం సాగుతోంది. దీనికి కేంద్ర ఆరోగ్యశాఖ క్లారిటీ ఇచ్చింది. కరోనా వ్యాక్సిన్ తీసుకోవడం స్త్రీ, పురుషుల సంతాన ఉత్పత్తిపై, పునరుత్పత్తి శక్తిపై ఎటువంటి ప్రభావం చూపదని కేంద్ర ఆరోగ్యశాఖ క్లారిటీ ఇచ్చింది. అది కేవలం పుకారేనని స్పష్టం చేసింది.
‘ఏ వ్యాక్సిన్ అయినా అందుబాటులోకి తీసుకొచ్చే ముందే అనేక దశల్లో క్లినికల్ ట్రయల్స్ నిర్వహిస్తారు. ముందు జంతువుల మీద, ఆ తర్వాత మనుషుల మీద అనేక దశల్లో ట్రయల్స్ నిర్వహించాక.. దానివల్ల ఎటువంటి చెడు ప్రభావం ఉండదని తేల్చిన తర్వాత మాత్రమే అనుమతులు వస్తాయి. కరోనా వ్యాక్సిన్ తీసుకోవడం వల్ల ఎటువంటి దుష్ప్రభావాలు కలగవు. ఇదంతా కేవలం తప్పుడు ప్రచారమే’ అంటూ కేంద్ర ఆరోగ్యశాఖ క్లారిటీ ఇచ్చేసింది.
పోలియో, మీజిల్స్-రుబెల్లాకు వ్యాక్సిన్ అందుబాటులో వచ్చిన సమయంలోనూ ఇటువంటి ప్రచారమే సాగింది. కరోనా వ్యాక్సిన్ అందుబాటులో వచ్చినప్పటి నుంచి అనేక తప్పుడు ప్రచారాలు వ్యాప్తి చెందుతున్న విషయం తెలిసిందే. దీంతో సామాన్యులు వ్యాక్సిన్ తీసుకొనేందుకు భయపడుతున్నారు. కేంద్ర, రాష్ట్ర ప్రభుత్వాలు ఎప్పటికప్పుడు ఈ ప్రచారాలను ఖండించే ప్రయత్నం చేస్తున్నాయి. ప్రస్తుతం దేశవ్యాప్తంగా ముమ్మరంగా వ్యాక్సినేషన్ కొనసాగుతున్నది. అయితే కొన్ని రాష్ట్రాలు మాత్రం .. తమకు కేంద్రం సరిపడినన్ని వ్యాక్సిన్ డోసులు ఇవ్వడం లేదని ఆరోపిస్తున్నాయి.