కాపు ఉద్యమ నేత ముద్రగడ పద్మనాభం అంత్యక్రియల సందర్భంగా జరిగిన ఘటనల నేపథ్యంలో తనపై నమోదైన కేసుపై మాజీ మంత్రి, వైఎస్సార్సీపీ నేత అంబటి రాంబాబు స్పందించారు. తనను రాజకీయంగా లక్ష్యంగా చేసుకుని ప్రభుత్వం కేసులు నమోదు చేస్తోందని ఆరోపించారు.
ముద్రగడ పద్మనాభం ఆత్మశాంతి కోసమే తాను పోలీసులను అడ్డుకున్నానని అంబటి రాంబాబు చెప్పారు. ముద్రగడ కుటుంబ సభ్యులు అధికార లాంఛనాలు వద్దని స్పష్టంగా చెప్పినప్పటికీ, ప్రభుత్వం వాటిని నిర్వహించేందుకు ప్రయత్నించడం సరైంది కాదని విమర్శించారు. ముద్రగడ కోరికను గౌరవించాలనే ఉద్దేశంతోనే తాము ఆందోళన వ్యక్తం చేశామని వివరించారు.
తనపై ముఖ్యమంత్రి చంద్రబాబు నాయుడు, మంత్రి నారా లోకేష్, డీజీపీ ప్రత్యేక దృష్టి పెట్టారని అంబటి ఆరోపించారు. ఏ చిన్న ఘటన జరిగినా తనపై వెంటనే ఎఫ్ఐఆర్లు నమోదు చేస్తున్నారని, గతంలో అమరావతి పర్యటన సందర్భంగా, రాజమండ్రి జైలు నుంచి విడుదలైన తర్వాత కూడా తనపై కేసులు నమోదు చేశారని పేర్కొన్నారు.
ముద్రగడ బతికి ఉన్నప్పుడు ఇబ్బందులు పెట్టి, మరణానంతరం అధికార లాంఛనాల పేరుతో రాజకీయాలు చేయడం సరికాదని ఆయన విమర్శించారు. కుటుంబ సభ్యులు వద్దన్న తర్వాత కూడా అధికారులు రావడం అనవసరమని అన్నారు. ముద్రగడ ఆత్మశాంతి కోసం తాము అడ్డుకున్నామని, అందులో తప్పేమీ లేదని అంబటి రాంబాబు స్పష్టం చేశారు.
తనపై వంద కేసులు పెట్టినా భయపడబోనని అంబటి రాంబాబు వ్యాఖ్యానించారు. కూటమి ప్రభుత్వంపై కాపు సామాజిక వర్గంలో తీవ్ర అసంతృప్తి ఉందని ఆయన ఆరోపిస్తూ రాజకీయ కక్ష సాధింపులో భాగంగానే తనపై చర్యలు తీసుకుంటున్నారని విమర్శించారు.