ప‌దేళ్ళ త‌ర్వాత ఫ‌లించిన నిరీక్ష‌ణ‌…. ధావన్‌, రోహిత్‌ మెరుపులు…

ఢిల్లీలోని ఫిరోజ్‌షా కోట్లా మైదానంలో జిరిగిన టీ20 మ్యాచ్‌లో భార‌త జ‌ట్టు అద్భుత‌మైన ప్ర‌ద‌ర్శ‌న‌తో న్యూజిలాండ్‌పై కోహ్లీసేన 53 పరుగుల తేడాతో ఘనవిజయం సాధించింది. పదేళ్ల వ్యవధిలో ఆడిన ఐదు మ్యాచ్‌ల్లోనూ భారత్‌కు ఓటమే ఎదురైంది. ఐతే ఎట్టకేలకు కివీస్‌కు ఈ ఫార్మాట్లో ఓటమి రుచి చూపింది భారత్‌. శిఖర్‌ ధావన్‌ (80; 52 బంతుల్లో 10×4, 2×6), రోహిత్‌ శర్మ (80; 55 బంతుల్లో 6×4, 4×6) మెరుపు ఇన్నింగ్స్‌లతో భారత్‌కు భారీ స్కోరు అందిస్తే.. ఆ తర్వాత బౌలర్లు సమష్టిగా సత్తా చాటి కివీస్‌ను కట్టడి చేశారు.

న్యూజిలాండ్‌పై వన్డే సిరీస్‌ నెగ్గిన టీమ్‌ఇండియా.. టీ20ల్లోనూ శుభారంభం చేసింది. మొద‌ట టాస్‌ ఓడి ముందుగా బ్యాటింగ్‌కు దిగిన భారత్‌ 20 ఓవర్లలో 3 వికెట్ల నష్టానికి 202 పరుగులు చేసింది. మ్యాన్‌ ఆఫ్‌ ద మ్యాచ్‌ శిఖర్‌ ధావన్‌ (52 బంతుల్లో 80; 10 ఫోర్లు, 2 సిక్సర్లు), రోహిత్‌ శర్మ (55 బంతుల్లో 80; 6 ఫోర్లు, 4 సిక్సర్లు) భారీ షాట్లతో చెలరేగారు. తొలి వికెట్‌కు 158 పరుగులు జోడించిన వీరిద్దరు భారత్‌ తరఫున ఏ వికెట్‌కైనా అత్యుత్తమ భాగస్వామ్యం నెలకొల్పడం విశేషం. చివర్లో కోహ్లి (11 బంతుల్లో 26 నాటౌట్‌; 3 సిక్సర్లు) కూడా ధాటిగా ఆడాడు. అనంతరం న్యూజిలాండ్‌ 20 ఓవర్లలో 8 వికెట్లకు 149 పరుగులు మాత్రమే చేయగలిగింది.

న్యూజిలాండ్ జ‌ట్టులో లాథమ్‌ (36 బంతుల్లో 39; 3 ఫోర్లు, 1 సిక్స్‌) ఒంటరి పోరాటం చేసినా లాభం లేకపోయింది. భారత బౌలర్లలో అక్షర్, చహల్‌ చెరో 2 వికెట్లు తీశారు. ఈ మ్యాచ్‌తో క్రికెట్‌కు వీడ్కోలు పలికిన నెహ్రా… తన ఆఖరి ఇన్నింగ్స్‌లో వికెట్‌ తీయకుండానే నిష్క్రమించాడు. తాజా ఫలితంతో మూడు మ్యాచ్‌ల సిరీస్‌లో భారత్‌ 1–0తో ఆధిక్యంలో నిలిచింది. రెండో టి20 శనివారం రాజ్‌కోట్‌లో జరుగుతుంది.

భారీ లక్ష్యాన్ని ఛేదించే క్రమంలో ఏ దశలోనూ న్యూజిలాండ్‌కు ఆదిలోనె దెబ్బ త‌గిలింది. రెండో ఓవర్లోనే స్పిన్నర్‌ను దించి భారత్‌ ఫలితం సాధించింది. చహల్‌ బౌలింగ్‌లో భారీ షాట్‌కు ప్రయత్నించిన గప్టిల్‌ (4) హార్దిక్‌ పాండ్యా అత్యద్భుత క్యాచ్‌కు వెనుదిరిగాడు. ఆ తర్వాత భువనేశ్వర్‌ సూపర్‌ యార్కర్‌కు మున్రో (7) వెనుదిరిగాడు. అనంతరం విలియమ్సన్‌ (24 బంతుల్లో 28; 1 ఫోర్, 1 సిక్స్‌) ఆదుకునే ప్రయత్నం చేసినా అది సరిపోలేదు. ఒక ఎండ్‌లో లాథమ్‌ నిలబడ్డా… మరో ఎండ్‌లో వరుసగా వికెట్లు పడ్డాయి. 16 పరుగుల వ్యవధిలో నాలుగు ప్రధాన వికెట్లు కోల్పోయిన న్యూజిలాండ్‌ ఇక కోలుకోలేకపోయింది. చివర్లో సాన్‌ట్నర్‌ (14 బంతుల్లో 27 నాటౌట్‌; 2 ఫోర్లు, 2 సిక్సర్లు) దూకుడుగా ఆడినా కివీస్‌ విజయానికి చాలా దూరంలో నిలిచిపోయింది.