వైఎస్సార్ కాంగ్రెస్ పార్టీ నాయకులను, కార్యకర్తలను లక్ష్యంగా చేసుకుని కూటమి సర్కార్.. రాజకీయ కక్షసాధింపు చర్యలకు పాల్పడుతోందని మాజీ మంత్రి, వైఎస్సార్సీపీ సీనియర్ నేత అంబటి రాంబాబు తీవ్ర స్థాయిలో ధ్వజమెత్తారు. గుంటూరులో ఏర్పాటు చేసిన మీడియా సమావేశంలో ఆయన మాట్లాడుతూ.. ప్రభుత్వం అనుసరిస్తున్న తీరుపై ఘాటు వ్యాఖ్యలు చేశారు.
రాష్ట్రంలో కూటమి ప్రభుత్వం అధికారంలోకి వచ్చినప్పటి నుండి శాంతిభద్రతలు క్షీణించాయని, కేవలం ప్రతిపక్ష పార్టీలను ఇబ్బంది పెట్టడమే ధ్యేయంగా పాలన సాగుతోందని అంబటి రాంబాబు ఆరోపించారు. తమ పార్టీ శ్రేణులపై అక్రమ కేసులు బనాయిస్తూ, భయభ్రాంతులకు గురిచేస్తున్నారని మండిపడ్డారు. పగ, ప్రతీకార రాజకీయాలతో రాష్ట్ర అభివృద్ధిని గాలికొదిలేశారని ఆయన విమర్శించారు.
కూటమి ప్రభుత్వం అధికార గర్వంతో కక్షసాధింపు రాజకీయాలు చేస్తోంది. వైఎస్సార్సీపీ నాయకులను ఇబ్బంది పెట్టాలని చూస్తే చూస్తూ ఊరుకోం. చట్టంపై మాకు నమ్మకం ఉంది, న్యాయస్థానాల ద్వారా పాలకుల అరాచకాలను ఎదుర్కొంటాం అన్నారు అంబటి.
సోషల్ మీడియాలో ప్రభుత్వ వైఫల్యాలను ప్రశ్నిస్తున్న యువతను, యూట్యూబర్లను అక్రమంగా అరెస్ట్ చేయడం ప్రజాస్వామ్యాన్ని పరిహాసం చేయడమేనని ఆయన పేర్కొన్నారు. గత ప్రభుత్వ హయాంలో జరిగిన పనులపై కావాలనే తప్పుడు విచారణలు జరిపిస్తూ, రాజకీయ ప్రయోజనాల కోసం వాడుకుంటున్నారని ఆరోపించారు.
ప్రజలు కూటమి ప్రభుత్వానికి ఇచ్చిన అవకాశాన్ని మంచి పరిపాలన కోసం ఉపయోగించుకోవాలని, అంతేకానీ ప్రతిపక్షాలపై పగ తీర్చుకోవడానికి కాదని అంబటి రాంబాబు హితవు పలికారు. వైఎస్సార్సీపీ ఎల్లప్పుడూ కార్యకర్తలకు అండగా ఉంటుందని…ప్రభుత్వ ప్రజా వ్యతిరేక విధానాలపై క్షేత్రస్థాయిలో పోరాటం కొనసాగిస్తామని ఆయన స్పష్టం చేశారు.