పార్లమెంట్ సమావేశాల్లో తిరిగి డీలిమిటేషన్ బిల్లు ప్రవేశ పెట్టేందుకు రంగం సిద్దం అవుతోంది. ఏప్రిల్ లో వీగిపోయిన ఈ బిల్లును తిరిగి ఆమోదించేలా ఎన్డీఏ తుది కసరత్తు చేస్తోంది. కావాల్సిన మెజార్టీ కూడగట్టే పని లో నిమగ్నమైంది. జాతీయ స్థాయిలో చోటు చేసుకుంటున్న పరిణామాలు ఇప్పుడు ఈ బిల్లుల ఆమోదానికి కలిసి వస్తున్నాయి. టీఎంసీ, శివసేన, ఆప్ లో చీలిక వర్గాలతో బిల్లు ఆమోదం ఖాయమనే అంచనాలు వ్యక్తం అవుతున్నాయి. దీంతో.. మహిళా, డీలిమిటేషన్ బిల్లులను లైన్ క్లియర్ అవుతోంది.
మహిళా రిజర్వేషన్ – డీలిమిటేషన్ బిల్లును ఎన్డీఏ ప్రభుత్వం ఏప్రిల్ 17, 2026న లోక్సభలో ప్రవేశ పెట్టింది. కాగా, రాజ్యాంగ (131వ సవరణ) బిల్లు ఆమోదం పొందడంలో విఫలమైంది. పార్లమెంటరీ స్థానాలను పెంచడం మరియు మహిళలకు 33% రిజర్వేషన్ల అమలును వేగవంతం చేయడం లక్ష్యంగా ప్రవేశపెట్టిన ఈ బిల్లుకు అనుకూలంగా 298 ఓట్లు, వ్యతిరేకంగా 230 ఓట్లు వచ్చాయి. సభకు హాజరై ఓటు వేసిన సభ్యులలో రాజ్యాంగపరంగా అవసరమైన మూడింట రెండు వంతుల మెజారిటీ లేకపోవటంతో బిల్లు వీగిపోయింది. ఈ బిల్లులు ఆమోదం పొందాలంటే ఉభయ సభల్లోనూ ‘మూడింట రెండు వంతుల మెజారిటీ’ అవసరం. ప్రస్తుతం లోక్సభలో 540 మంది సభ్యులు ఉన్నారు; ఏదైనా రాజ్యాంగ సవరణకు కనీసం 360 మంది ఎంపీల మద్దతు లేదా మూడింట రెండు వంతుల మెజారిటీ అవసరం. ప్రస్తుతం, ఎన్డిఎ (NDA)కు 298 మంది ఎంపీల మద్దతు ఉంది.
కాగా, తిరుగుబాటు చేసిన 20 మంది TMC ఎంపీలు ‘నేషనలిస్ట్ సిటిజన్స్ పార్టీ ఆఫ్ ఇండియా’ (NCPI)లో విలీనం కాగా, ఉద్ధవ్ థాకరే నేతృత్వంలోని శివసేన (UBT)కు చెందిన ఆరుగురు ఎంపీలు ఏక్నాథ్ షిండే శివసేనలో చేరారు. దీనితో ఎన్డిఎ బలం 324కు పెరుగుతుంది, అయినప్పటికీ అవసరమైన మెజారిటీకి ఇది ఇంకా 36 ఓట్ల దూరంలోనే ఉంటుంది. DMKకు చెందిన 22 మంది ఎంపీలు మరియు శరద్ పవార్ నేతృత్వంలోని ఎన్సిపి (SP)కి చెందిన ఎనిమిది మంది ఎంపీలు ప్రభుత్వానికి మద్దతు ఇచ్చే అవకాశం ఉందనే రాజకీయ ఊహాగానాలు కూడా ఉన్నాయి. ఒకవేళ అలా జరిగితే, ఎన్డిఎ సంఖ్యాబలం 354కు చేరుకోవచ్చు. అప్పుడు కూడా, ప్రభుత్వం మూడింట రెండు వంతుల మెజారిటీ మార్కుకు ఆరు ఓట్ల దూరంలోనే ఉండిపోతుంది. అటువంటి పరిస్థితుల్లో, చిన్న పార్టీలు మరియు స్వతంత్ర ఎంపీల మద్దతు తో ఈ బిల్లులను గట్టెక్కించాలని ఎన్డీఏ ప్రణాళికలు సిద్దం చేస్తోంది. తాజాగా అమిత్ షా తో శరద్ పవార్ కుమార్తె సుప్రియా సూలే భేటీ తరువాత చేసిన వ్యాఖ్యలు.. బిల్లు ఆమోదం దిశగా సంకేతాలుగా భావిస్తున్నారు.