విశాఖపట్నంలో గీతం సంస్థ భూకబ్జా వ్యవహారం మరోసారి చర్చనీయాంశంగా మారింది. గీతం యూనివర్సిటీ ఆక్రమించిందని ఆరోపిస్తున్న భూముల విషయంలో తక్షణ చర్యలు తీసుకోవాలని వైసీపీ నాయకులు జిల్లా కలెక్టర్కు ఫిర్యాదు చేశారు. ఈ మేరకు వైసీపీ జిల్లా అధ్యక్షుడు కేకే రాజు, మాజీ ఎమ్మెల్యే వాసుపల్లి గణేష్ కుమార్ నేతృత్వంలో పలువురు పార్టీ నాయకులు, స్థానికులు కలిసి కలెక్టర్ను కలిసి వినతిపత్రం సమర్పించారు.
గీతం సంస్థ ప్రభుత్వ భూములను ఆక్రమించి నిర్మాణాలు చేపడుతోందని వైసీపీ నాయకులు ఆరోపించారు. ఈ నేపథ్యంలో ఆక్రమిత భూములపై జరుగుతున్న నిర్మాణ పనులను వెంటనే నిలిపివేయాలని వారు డిమాండ్ చేశారు. ప్రభుత్వ భూములను కాపాడాల్సిన బాధ్యత అధికారులపై ఉందని, ఈ విషయంలో ఎలాంటి ఆలస్యం చేయకుండా తక్షణ చర్యలు తీసుకోవాలని కోరారు.
అంతేకాకుండా గీతం భూ ఆక్రమణ అంశంపై ప్రజల్లో తీవ్ర ఆగ్రహం ఉందని తెలిపారు. అదే కారణంగా ఒకే రోజు వందలాది మంది స్థానికులు కలెక్టర్ కార్యాలయానికి వచ్చి ఫిర్యాదులు చేసినట్లు వైసీపీ నేతలు వెల్లడించారు. ప్రజల అభ్యంతరాలను పరిగణలోకి తీసుకుని సమగ్ర విచారణ చేపట్టి నిజానిజాలను వెలుగులోకి తేవాలని వారు కోరారు.
ఈ ఫిర్యాదులపై జిల్లా కలెక్టర్ స్పందిస్తూ విషయాన్ని పరిశీలించి తగిన చర్యలు తీసుకుంటామని హామీ ఇచ్చినట్లు సమాచారం. గీతం భూకబ్జా ఆరోపణలపై ఇప్పుడు జిల్లా పరిపాలన ఏ చర్యలు తీసుకుంటుందన్నది ఆసక్తికరంగా మారింది.