అమెరికా ఎగువ సభ-సెనేట్ను డెమొక్రాట్లు హస్తగతం చేసుకున్నారు. నూతనంగా ఎన్నికైన ముగ్గురు డెమొక్రటిక్ సభ్యులు తాజాగా ప్రమాణస్వీకారం చేశారు. దీంతో 100 మంది సభ్యులు ఉండే సభలో మెజారిటీ 50-50కి చేరింది. అయితే సెనేట్కు నేతృత్వం వహించే ఉపాధ్యక్షురాలు కమలా హారిస్.. డెమొక్రాటిక్ పార్టీకి చెందినవారు కావడం వల్ల.. వీరికి ఆధిక్యం లభించినట్లైంది. ఏదైనా అంశంపై ఓటింగ్లో ఓట్లు సమానంగా చీలిపోతే.. సెనేట్ సభాధ్యక్షుడు టై బ్రేకర్ ఓటు వేస్తారు.
అమెరికా ఉభయసభలతో పాటు, వైట్ హౌస్ డెమొక్రాట్లు చేజిక్కించుకోవడం గత పదేళ్లలో ఇదే తొలిసారి. ఇప్పటికే ప్రతినిధుల సభలో డెమొక్రాట్లకు సంపూర్ణ మెజారిటీ ఉంది.
కొత్తగా సెనేట్లో అడుగుపెట్టినవారిలో జాన్ ఓసోఫ్, రాఫెల్ వార్నాక్, అలెక్స్ పాడిలా ఉన్నారు. ఇన్వెస్టిగేటివ్ జర్నలిస్ట్ అయిన ఓసోఫ్.. జార్జియా నుంచి గెలుపొందారు. అట్లాంటాలోని చర్చిలో పాస్టర్గా పనిచేసే వార్నాక్ సైతం ఈ రాష్ట్రం నుంచే ఎన్నికయ్యారు. మరోవైపు, సెనేటర్గా కమలా హారిస్ రాజీనామాతో కాలిఫోర్నియా రాష్ట్రంలో ఏర్పడిన స్థానానికి పాడిలా ప్రాతినిథ్యం వహిస్తున్నారు. కమల వైదొలిగిన అనంతరం మిగిలిన కాలం పాటు సెనేటర్గా కొనసాగుతారు.