టీటీడీ ధర్మకర్తల మండలి సమావేశంలో పలు కీలక నిర్ణయాలు తీసుకున్నారు. భక్తులకు మెరుగైన సౌకర్యాలు, సంస్థ అభివృద్ధి లక్ష్యంగా ఈ నిర్ణయాలు తీసుకున్నట్టు టీటీడీ ప్రకటించింది. తిరుపతిలో సుమారు 20 ఎకరాల విస్తీర్ణంలో ఆధునిక సదుపాయాలతో కూడిన ఇంటిగ్రేటెడ్ టౌన్షిప్ను నిర్మించాలని నిర్ణయించారు. ఇందులో వసతి, ఆధ్యాత్మిక, వాణిజ్య అవసరాలకు అనుగుణంగా సౌకర్యాలు కల్పించనున్నారు.
అలాగే ముంబై బాంద్రా ప్రాంతంలో రూ.14.40 కోట్ల వ్యయంతో శ్రీవారి ఆలయ నిర్మాణానికి ఆమోదం తెలిపారు. దేశవ్యాప్తంగా ఉన్న భక్తులకు ఇది ఆధ్యాత్మిక కేంద్రంగా నిలవనుంది. ధ్వజస్తంభాలు, రథాల తయారీ కోసం అవసరమైన కట్టెల కోసం 100 ఎకరాల విస్తీర్ణంలో దివ్య వృక్షాల పెంపకం చేపట్టాలని నిర్ణయించారు. ఇది పర్యావరణ పరిరక్షణకూ దోహదపడనుంది.
టీటీడీ ఆధ్వర్యంలోని విద్యాసంస్థల్లో డిజిటల్ క్లాస్రూములు ఏర్పాటు చేయడంతో పాటు భద్రత దృష్ట్యా సీసీ కెమెరాలు ఏర్పాటు చేయనున్నారు. ఎస్వీ జూనియర్ కాలేజీల డేస్కాలర్ విద్యార్థులకు మధ్యాహ్న భోజన పథకం అమలు చేయాలని నిర్ణయం తీసుకున్నారు. దీంతో పేద విద్యార్థులకు పెద్ద ఊరట కలగనుంది.
తిరుమల రహదారులకు శ్రీవారి నామాలతో పేర్లు పెట్టాలని మండలి నిర్ణయించింది. అదేవిధంగా అర్చకులు, పరిచారకులు, పోటు వర్కర్ల వేతనాలను పెంచేందుకు కూడా ఆమోదం తెలిపింది. ఈ నిర్ణయాలతో టీటీడీ పాలనలో మరింత పారదర్శకత, భక్తుల సంక్షేమం, ఉద్యోగుల సంతృప్తి పెరుగుతాయని అధికారులు తెలిపారు.